最近盛傳劉鑾雄女友呂麗君失勢,俾大劉放逐去英國,而大劉啱啱又斥資4.2億購入咗英國伊頓廣場(EatonSquare)一座樓高6層嘅豪華大宅,有傳搵咗呂麗君去收樓。
心情靚爆
至於大劉另一女友甘比(陳凱韻)就越嚟越得寵,唔少宴會場合大劉都會帶埋甘比一齊出席,好似前日大劉又同甘比、囡囡秀樺、媽媽、胞妹劉玉珍以及甘比媽咪等人去灣仔福臨門嘆茶享受天倫樂。
前日下晝一點左右,甘比帶住囡囡同埋媽咪坐平治抵達福臨門。甘比媽咪一手抱住秀樺,甘比就孭住個手袋又攞住個手挽袋,相信裏邊應該都係裝住囡囡嘅用品。甘比同媽咪一支箭咁走入酒家,大約幾分鐘後,劉老太、劉玉珍以及大劉亦陸續抵達,大劉仲同福臨門門口報紙檔嗰位阿姐打招呼,心情睇嚟唔錯。
大劉同甘比嘆茶嘆到下晝2點半左右離開,抱住囡囡嘅甘比,臨上車之前仲細細聲叫囡囡同爸爸講拜拜,真係溫馨。