熊黛林（Lynn）和郭富城戀事地面化，昨日Lynn出席首飾店開幕，獲送7萬多元串有城城英文名字縮寫的AK頸鏈，喜出望外，不過她為保女性矜持，堅持不認因「掛住」城城，又指多年來沒收過男士送的特別情人節禮物。
熊黛林、林莉、陳見飛和Rosemary等，昨日在中環出席首飾品牌Pandora開幕禮。一回港就密密出騷搵錢的Lynn，穿上桃紅色單肩裙，紅光滿面。大會安排了一個PandoraBox給Lynn打開，傳說打開PandoraBox，會帶來希望，但煩惱都隨之而來。
冇買情人節禮物
PandoraBox內放了一條價值7萬多元、Lynn男友郭富城英文名AaronKwok的縮寫AK頸鏈，Lynn喜出望外，但被一再追問城城時，她則忍不住不耐煩。
Lynn說：「好鍾意條頸鏈，因為好多機會可以戴。」因為有AK，等如掛住城城？她即發嬌嗔說：「條鏈唔係我揀，係佢哋送畀我。」她下月返南京過新年，問到城城會否上門拜候其父母？Lynn即說：「唔會，佢有自己屋企。」214不見，改為中國情人節元宵節慶祝？她說：「內地元宵唔係情人節，係同家人團圓嘅意思，七夕先係講情人。」
再問Lynn準備甚麼情人節禮物，她說：「點解要準備，人哋送我咪收囉。」她指內地過去不重視情人節，來港前沒特別留意此節日，來港後則會和朋友吃飯，但從沒收過特別的禮物，但試過送刻名鎖匙扣給男性朋友。
陳見飛怕再養仔
此外，陳見飛之前暴瘦，她昨日自爆已回升5磅至110磅，她說：「我肥番，日日食早餐，同埋戒食麥當勞。」一提到情人節，拍拖大過天的陳見飛，開心說：「我已經遇到一個男仔，佢係familyfriend，細細個就識，家成日傾電話，不過仲未係男朋友，順其自然啦。大家年紀差唔多，我唔想搵啲細過我嘅，又要我養佢。」
有指胞弟陳冠希要養起全家？陳見飛大反應說：「呢啲係垃圾（報道），我財政獨立，由頭到尾都冇信用卡，我冇負債，自己賺幾多用幾多。」
採訪：JessicaNgan
攝影：DickyChan