貧富懸殊並非香港獨有，係全世界現象，北歐就冇咁嚴重，因為北歐國家經濟上係資本主義體制，政治上近乎社會主義，稅率高，社會福利多如牛毛，計除稅後收入，CEO與清潔工嘅分別不太大。但各國國情不同，叫美國學習瑞典，美國選民一定唔制，叫瑞典學美國，瑞典選民又未必肯噃。如果香港有立法會議員或者財政司司長提出動議，向年薪一百萬元以上人士抽稅四成，年薪一百五十萬元以上抽五成，二百萬元以上者抽八成，你估香港人會點反應呢？
與廠商L在午飯時講起，立即畀佢痛批：「咁高稅率，想整死香港咩，香港係靠低稅率吸引人才與外國投資者嘅，我哋冇資格學瑞典！」騎騎，你估左丁山又會贊成咩，不過做吓腦震盪而已。香港講高稅率唔得，講廢除聯繫滙率唔得，講吸引輕工業工廠回流唔得，講環保得喇啩？邱騰華局長繼慳電膽之後，又推出電器電子廢物回收諮詢文件，電器零售界噓聲四起，環保團體就唔拍掌，究竟行唔行得掂呢？廠商L話：「好易啫，叫政府撥款六億，在屯門或將軍澳設立中央回收處理廠先啦。」叫政府畀？由政府經營呀？政府點會制呀，政府係想招標，搵人投資設廠喎。廠商L話：「香港最熟悉呢個問題嘅，怕且係電子業商會會長陳其鑣，佢個幾兩個月前帶隊去日本考察電子廢器回收廠，發覺一間廠要投資過六億元，而且冇錢賺，只係電子電器產品製造商因在產品銷售方面賺大錢，故此聽政府話，設廠回收舊物啫，香港電器產品全部入口，本地冇製造商，唔通由入口商與零售商一齊合作，斥資六億元設廠做蝕本生意？講鬼古呀！」左丁山半開玩笑：「你咁有錢，不如你去投標？」廠商L大笑，「我哋行家冇人有興趣在香港投資呢啲項目嘅，一怕官商勾結指控，二怕與本地衙門周旋，三來如果我哋肯大拿拿拎六億出嚟，大陸滿地係投資機會，回報率甚高，點解要在香港做賠本生意！前兩點可以勉強啃落，但第三點無可抗拒，冇得傾！」