之前好多人估雲尼斯達萊會返英超，點知佢就揀咗去德甲，從皇家馬德里免費轉投漢堡及簽約18個月。呢位33歲荷蘭射手唔返英超，可能係佢唔想同令佢名成利就嘅曼聯打對台有關；但從實際角度諗，熱刺開畀佢份約係幾好，雖然聽講周薪有成8萬鎊（約100萬港元），不過就係落場先有糧出，佢自己知自己事，近呢一年養傷多過比賽，所以真係冇着數。至於韋斯咸向佢開出周薪10萬鎊，但弊在對方喺英超護緊級，話晒佢係球星，點會考慮呀。家陣佢加盟漢堡，聽講成份糧少於530萬鎊（18個月），但漢堡喺德甲話晒係強隊，而且德甲嘅比賽速度冇英超咁快，計落除笨有精。