慧妍雅集噚日喺迪欣湖舉辦《邁步為綠惜》慈善步行籌款，袁詠儀擔任愛心大使，而慧妍雅集應屆會長莫可欣就同老公方中信帶埋囡囡一齊出席，另外梁小冰一家三口都有到場支持。
求學唔係求分數
一向型慣嘅方中信暫時放低冷面形象，噚日全程湊住愛女，又攬又抱，又幫個女抹鼻，十足廿四孝老竇。方中信透露囡囡迦晴已經19個月大，老婆仲提議畀個女學彈琴，方中信隨即阻止，佢話：「學琴咁老套，個個女仔都話畀佢學琴，應該畀佢跟我學風帆同電單車，要有型。」但係呢啲玩意完全幫唔到小朋友入學攞分，方中信就有啲勞氣咁話：「唔可以淨係為入學，求學唔係求分數。」
不過方中信喺大合照時見到全部都係女人，影咗兩張相之後就縮埋去後邊，事後仲話：「嘩！全部都係女人，唔係好想影，不過老婆係會長。」
另外3月要去外地工作嘅方中信，話擔心到時唔捨得個女，所以呢排都會抽多啲時間陪個女，仲成日做個女嘅司機，無非爭取多啲時間見面。
靚靚爆選美批踭
至於靚靚袁詠儀話家開始停工，佢之前推咗一套7位數酬勞嘅電影，原來佢家都係以生BB為大前提，仲話極希望生個女，到時囝囝慕童就有人陪，問到靚靚如果追到個女會唔會畀個女去選港姐，佢就話：「做呢行要好成熟面對傳媒嘅壓力，當中包括人與人嘅鬥爭，同埋批踭，到時睇吓仲興唔興選美先算啦。」
