上次講開，敏妮認識兩姊妹夾份買樓成功上車嘅故事。家陣兩姊妹差唔多供滿層樓，但就面對另一個問題。以前為咗「上車」，所以買嘅單位面積大極有限，家陣層樓差唔多供滿，當然想有更大空間，所以近期兩人不約而同有換樓嘅念頭。
其實最簡單嘅方法係，賣咗現時住緊嗰層樓，再買過另一層，又或者分錢各自買樓。不過姊妹兩人都唔想賣咗住緊嗰層樓，驚賣咗之後，樓價進一步上升，佢哋未趕及換過層大啲嘅單位不特止，連原本同樣質素嘅單位都可能買唔番。
佢哋諗過不如姐姐買埋妹妹嗰份業權，等妹妹再買過另一層物業。不過兩姊妹就樓價問題有唔同意見，始終賣層樓畀外人，就梗係想賣價越高越好，但兩姊妹一個係買家，一個係賣家，即使用銀行估值做參考，都有幾個唔同嘅價。
「內部轉讓」定價易有爭拗
最後兩姊妹諗咗一個折衷方法，就係夾錢買過另一層樓，即係兩姊妹共同擁有兩個物業。聽佢兩姊妹講，既然兩人都鍾意舊樓唔想賣，只係嫌舊同兩個人住太逼狹，咁多買一層，就可以增加居住空間，加上新樓裝修好入伙時，兩姊妹一齊搬去住，騰空舊樓裝修。等舊物業裝修好，其中一個就可以搬返舊屋度住。
聽落好理想，但敏妮相信仲有問題。因冇兩個單位係相同嘅，即使同一幢樓、同一座向，但層數唔同已經影響樓價，咁邊個住貴啲嗰層？如果係唔同嘅物業，管理、設施、樓齡都唔同，咁兩姊妹到時又會唔會有爭拗呢？為免姊妹反目，敏妮都係提議佢哋兩姊妹諗清楚好啲。
溫敏妮