過去數個交易日過千點的跌浪，是由一連串美麗的誤會造成，先有美股假期後，港股喺自由搏擊下挾升，炒上海直通車概念。然後上周三內地否認，即時同場加映一幕內地「加息疑雲」，大戶藉機大手派貨。上周四內地經濟數據公佈後，通脹升溫，加息高唱入雲。適逢其會，奧巴馬使出組合拳，唔畀銀行坐盤炒股，雖然暫時只係得把口講，道指即時唔畀面，大行發威唔係人咁品，兩日就跌逾4%。
市場消息話，歐美一聽到呢單消息，即有對冲基金被贖回，當中更有唔少係BuyChina嘅基金，從上周五跌勢一發不可收拾嘅盤路可見，有啲似海嘯期間場外衍生工具引發嘅連鎖程式盤斬倉。
董平打造傳媒王國
既然基金陸續Good水換馬，投資者有賺嘅不妨先減吓磅。真係戒唔甩賭癮，大價指數股博唔過，快閃短炒國策概念股。「三網合一」炒電訊、設備，甚至連節目供應商鳳凰衛視（2008）都炒到水尾，其實仲有一隻將成阿爺媒體旗艦嘅，係文化中國傳播（1060）。佢同人民網上月宣佈合組公司，為中國移動（941）4億用戶提供手機電視節目，近期仲收購咗一間叫Youline，專寫手機Java程式同遊戲嘅公司，有望大搞手機版網游。
呢隻前身係上聯水泥嘅殼股，背後撐腰嘅係被譽為內地民營電影之父，兼前保利華益總裁董平。唔識佢？01年揚威奧斯卡嘅電影《臥虎藏龍》、05年嘅《赤壁之戰》，其中一家投資者就係佢打骰嘅華益。搞製作同發行之外，佢仲收購儲存近160部中國經典電影版權，建成內地唯一的華億影視片庫，為日後賣「內容」創造更大收入來源鋪路。
去年董平先以蝕讓價沽出水泥業務，然後收購電影公司，最後以4億元入股京化文化傳播35%，為內地媒體王國正式開綠燈，因京化文化擁有《京華時報》同京華網，同官方人民網關係密切。公司話最終大計係發展智能手機電視，每人收10蚊月費，即使只得1000萬客，一年計收益就12億元，而且有牌經營嘅公司寥寥可數，唔怪得股價喺大跌市都咁靚仔。
胡孟青