五區公投運動廣告用咗「起義」一詞，引起全民熱烈討論，激發親北京陣營瘋狂攻訐，單係宣傳效用嚟講，已經可以話係相當成功。八方同時發現，今次討論仲好有教育意義，大家起勢咁查《康熙字典》、《辭淵》不特止，「知日部屋」嘅博客仲神心，搵番晒「起義系」嘅嘢出嚟。八方發覺，其實中港台都有好多活動鍾意用起義兩個字。由於驚當局遲啲會禁用呢兩粒字，八方現整理如下，立此存照。
1.戀愛起義
01年港產片，林海峰監製，夏永康、謝霆鋒、馮德倫、芝See菇Bi執導，當年已經「好大膽」咁用上「給你起一場革命」宣傳字句，可以話係一部「前80後」作品。
2.文化起義
幾年前西九文化區爭議中，誠哥紅顏知己周凱旋小姐嘅Tom旗下CUP出版社出嘅一本書，煲呔智囊劉細良有份寫文介紹東京六本木山。冇事啩？
3.青春起義09
循理會屯門青少年綜合服務中心推出嘅計劃，鼓勵青年人自發組織同舉辦義務工作活動，宗旨係「以青年人力量回饋社會，建設社區」。好有意義，但因住同係基督徒嘅鼠王芬話你哋唔合憲呀。
4.時尚起義
自稱中國最大網絡服裝品牌之一，韓味甚重。
5.劇場起義
舊年香港巧克力劇場搞嘅文化活動。
6.音樂起義
手機商諾基亞喺台灣搞嘅演唱會兼音樂比賽。
7.早餐起義
有點無聊但幾好玩嘅網上格鬥遊戲，同厭倦咗嘅單調乏味早餐包括麪包、麥皮呀咁單挑。
8.創作起義
2007北京大型創作市集。
9.綠色生活起義
台灣網站，唔係綠營宣傳台獨，而係教小朋友過保護環境綠色生活，啲動畫公仔好得意，啱晒細路哥。
10.樂色起義
2009北京垃圾桶設計大賽，「樂色」係外省人講廣東話「垃圾」嘅諧音。
除此以外，全國人大常委范徐麗泰前日指起義有革命流血之意，搞到啲網民家擔心中共會禁售玉泉汽水，因為當年玉泉廣告有句口號「玉泉起革命，一齊嚟響應」；佢哋又話CCTVB都可能揩嘢，因為《星期二檔案》做過一輯〈默書起革命〉。不過，有網民質疑，范太等建制派認為起義即革命，所以佢哋反對，咁佢哋即係「反對革命」，該當以中華人民共和國「反革命」罪懲戒。
mailto:[email protected]