羅馬前日作客贏祖雲達斯場波極富戲劇性，仲係懷斯嘅個人騷。呢個挪威後衞完場前8分鐘單刀令保方出超技術領紅牌出場、間接令迪亞比路被換走，到補時又助攻頂入奠勝。可以話，佢一個人玩謝保方、迪比亞路，同埋猶如置身壓力煲嘅費拉拿。成世仔，懷斯最威都係今次。
保方狼狽攞紅牌
呢場意甲大戰同西甲巴塞隆拿大炒華拉度列撞時間，波友未必捧場，係咁嘅話就錯過幾個觀戰激點。首先係東尼一開波就傷出，令啱啱傷好嘅「王子」托迪匆匆以後備身份臨危受命；到下半場初段迪比亞路左腳窩利彈內柱入，證明佢「卡士」猶在。及至托迪68分鐘憑12碼歷來首度作客攻破「老婦人」大門，不過場波嘅主角，點計都係懷斯。
人做我唔做，殺出新血路！當82分鐘比數仲係1:1嘅時候，羅馬反擊但唔係好多人願跑前，惟獨29歲嘅懷斯喺後場疾走接應長傳單刀，令保方被迫出禁區踢低佢被趕出場。祖記教練費拉拿亦因此被迫換走老將迪比亞路，騰出名額畀曼寧加出場把關。去到補時，大衛比沙路喺中前場截到波後，懷斯又奮勇舉晒手叫隊友斬波，仲接應頂成2:1。賽後眾隊友都走去懷斯度攬吓佢拍吓佢，成為大英雄。
曾累利記歐聯出局
「呢球係我職業生涯最重要入波！」懷斯賽後High晒：「比賽最後5分鐘我當自己踢前鋒，有波入令我開心到飛起。」佢季初作客錫耶納都試過完場前入波，今次咁威擺明靠嗰份英超式鬥到最後嘅拼勁，試問有幾多意甲守衞到末段仲肯上前打拼？提到懷斯，以後咪淨係記得佢當年歐聯對車路士擺世紀烏龍，累紅軍出局一幕啦。
懷斯威，倒戈教練雲尼亞里威，費拉拿就大件事，「老婦人」主場聯賽3連敗，話唔定日內就傳出佢食無情雞嘅消息囉。
