76人後衞艾華遜（AI、圖）獲得明星賽東岸正選後，外界一直有唔少反對聲音，認為34歲嘅艾華遜已不復當年勇，點可以擔任正選，我求大俠就覺得呢類評論好唔公平！好在艾華遜都用表現證明自己嘅實力，佢上周六又幫76人作客以107:97擊敗溜馬，令76人以15勝28負升上東岸第12位，雖然入季後賽嘅路仲好遠，之不過自艾華遜加盟後，隊波已重返正軌，擺脫季初5勝15負劣勢。76人教練艾迪佐敦、前鋒白蘭特仲開口力撐艾華遜，話佢對球隊好重要，艾迪佐敦仲話艾華遜少咗從前嘅速度、但多咗豐富嘅經驗、智慧。得分下降，其實係艾華遜轉型成功，變成團隊第1嘅球員！