前排港股無甚方向之時，半新股輪流炒，散戶只要留意到邊一隻未炒過而買入，唔難有收穫。最近大市氣氛轉壞，幾乎乜股都跌，何況係半新股？
不過肯用心發掘，其實仲有半新股上市到家陣都未大炒過，好似從事提供綜合資訊通訊應用解決方案，及應用服務的中國全通（633），該股去年9月以每股1.60元上市，掛牌初期股價升過上最高2.02元，但無耐就向下炒，仲跌穿埋招股價，去年底更一度低見過1.40元水平。
中國全通其後展開反彈，可惜升至今個月中1.81元又見阻力，近日在50日線水平徘徊，上周五收1.60元，跌1.2％。嚴格而言，中國全通未曾大炒過，不妨放入觀察名單，有閒錢可吼低位買些少揸中線。
中國全通應用解決方案業務分三類，包括衞星通訊、無線數據通訊及呼叫中心應用解決方案等，用戶主要係內地政府部門及工商機構，用於社會公共安全、城市應急通訊及城市綜合管理。
方星俠