【本報訊】即使婚姻，都無法使兩個人添上血緣關係，但骨髓捐贈可以。祖籍湖南的愛笑女生永輝，四年前發現自己患上白血病，其間遇上來自香港的暗戀者表白，堅持許下婚盟，又帶她到香港診治，結果讓她遇上生命中另一個天使俊瑜，捐出骨髓讓她重生。
「我最近去驗血，醫生話我血色素低咗，我即刻話畀佢知。」「係呀，因為我有少少地中海貧血，醫生話貧血都捐得骨髓。」貧血卻是永輝及俊瑜二人血脈相連的印記。
夫：上天派我嚟救你
永輝在深圳餐廳工作，05年底因持續發燒，發現患上白血病，回到鄉下治理，「做化療食唔到嘢，淨係嘔，男女病人又同住，舅父同大伯嚟探我，我同佢哋講我唔想死喺呢度。」
06年初，她病情穩定，回到深圳跟家人過年，重遇她後來的丈夫劉先生。
劉先生經常光顧永輝工作的餐廳，知道她病情後，向她表白，「佢同我講原來佢一年前已經鍾意咗我，我拒絕咗佢，覺得有咁嘅病唔係咁適合拍拖，但係佢由長沙追到我屋企。」
回到湖南後，永輝病情急轉直下，劉先生卻向她求婚，最後她心軟接受婚約，每次在病房抽骨髓化驗，丈夫就在外面哭，「佢同我講，唔使擔心，因為係上天派我嚟救你。」
06年丈夫接她來港，接受骨髓移植，「我覺得個天冇放棄過我，嗰日醫院啲姑娘打嚟，我喺屋企掃緊地，一聽到電話話搵到骨髓，我即刻開心到成個跳起身，攬住奶奶笑。」
那邊廂的俊瑜，形容捐骨髓猶如去「三日兩夜露營」，過程簡單，一年後二人終首次見面，永輝說：「我有激動到喊，覺得佢係心地好好嘅人，冇咗Sophia（俊瑜洋名），我哋一家人都冇咁完美、冇咁快樂。」
所捐骨髓兩周會再生
紅十字會輸血服務中心高級醫生李卓廣指，現時本港捐贈者登記冊有7.2萬人，以女性為主，計劃每年招募2,000人登記，目標是數年後達10萬人登記。李卓廣解釋，抽骨髓的方法有兩種，一種是從盆骨抽取骨髓，需全身麻醉，住院最快一天便可出院；另一種是用血液細胞分離機，從血液中分離出血幹細胞，再將其他血液成份回流身體；捐獻者捐出的造血幹細胞在一至兩個星期內會全部再生。