有人話專業人士愛單嫖獨賭，不過有啲活動，始終一大班人玩先過癮，因此大律師公會、律師會、醫學會、牙醫學會、測量師學會、建築師學會及會計師公會七大專業團體，早年共同成立「康體會」，不時搞友誼賽聯絡感情，「康體會」新一屆幹事會日前舉行就職禮，請來「體育太上皇」小霍主禮，仲有被指逢請必到，逢到必早嘅專業聯盟主席梁振英CY。
似乎已經全職角逐特首嘅CY家陣晚晚有約，呢個康體會有咁多專業人士票，真係幾忙都要出席，CY唔止上台致辭，仲由頭坐到落尾，客串人肉佈景板畀各專業團體影合照，面對小圈子選民，CY的確誠意可嘉。
CY面不改容
小霍對專業人士無所求，因此亮相後即撇，最爆笑係佢上台致辭時，竟然兩度錯叫CY做YC，錯一次就話無心之失啫，錯兩次離譜啲喎！在場唔少人都竊竊私語，思疑點解小霍咁唔畀面CY，難得CY面不改容，EQ爆棚，唐唐隨時望塵莫及。