玄學家麥玲玲做纖體代言人賣肉養孤兒（因為佢將代言人酬金捐晒畀孤兒），可惜好心冇好報，近日頻頻被侵權，海關破獲佢嘅運程書被翻版後，佢發現連AppleStore都有疑似翻版書。
「諗住放本書喺AppleStore，俾人用iPhone下載，點知Apple話已經有一本麥玲玲運程書，唔畀我放！」玲玲講番都火起，對方要求佢證實自己有麥玲玲嘅copyright，「一時之間都唔知點證實自己係麥玲玲。」佢追查發現，係一間公司之前搵佢拍咗12生肖短片俾人下載，但對方連佢本書都上載埋，為保障權益，佢決定出律師信畀對方。
佢話雖然Apple從善如流，不過都有手尾，「有個後生仔download咗侵權本書，發現內容太少，打電話嚟鬧我。」瘦身後咁多事發生，睇嚟佢肥肥白白好運啲喎。