人多好辦事，難得多的都是大星：謝霆鋒、張學友、徐若瑄、徐熙媛等不能盡錄，串星也絕不含糊，包括容祖兒、吳彥祖、林海峰等。講的是著名攝影師夏永康初次執導的電影《全城熱戀熱辣辣》。1,000萬成本，已有5,000萬的陣容，友情無價，利是也省回，夏永康可做的只有無言感激。 撰文：何永寧
平面攝影師出身的夏永康（WingShya）入行10多年，合作的都是圈中數一數二的巨星，王家衛多部電影如《春光乍洩》、《2046》等的海報和劇照都出自其手筆，但擔任導演還是頭一趟，由大師傅變影壇初哥，可幸的是有另一位初哥陳國輝（Tony）聯合導演分擔壓力。Wing說：「同Tony合作好似夾band，大家都係讀美術出身，所以會有一樣嘢堅持，就係戲一定唔可以『娘』，就算死人都要死得夠靚。」
請教王家衛、張叔平
故事兩年前已經完成，但要在兩個月內搵景和趕起50組戲，每日都如打仗，Wing回想當時每日都睡眠不足，他說：「因為要趕農曆新年情人節檔期，每日都瞓唔到兩個鐘。之前都有請教過王家衛同阿叔（張叔平），王導演話拍攝要堅持，阿叔就叫我放膽試。以前見王家衛有時為咗一個鏡頭搞到自己好頭痛，我當時心諗有幾頭痛呀？家諗番原來真係可以好傷腦筋。」
打友情牌無言感激
最令Wing敬佩的是王家衛可以為一件衫停機數天，他自嘆沒這份能力，他說：「佢係老闆有時間有錢，我就打工仔每日拍攝都係錢，所以我玩唔起，但就學曉佢講嘅堅持。到家先知原來王家衛比我知道嘅仲犀利，睇番佢拍嘅食飯戲、打麻雀戲，真係可以拍得好靚，好有上海人嘅味道，做過先知要喺視覺上拍到咁獨特係好難。」
除了有大導演幕後指導，Wing的電影也一如片名《全城熱戀熱辣辣》般，動員了全城炙手可熱的好演員，單是演員費就足以令他超支，對此Wing一直心存感激，他說：「呢個時間先發現自己喺圈裏面真係好多朋友，唔好講霆鋒、吳彥祖，未入行已經識佢哋，學友、余文樂同祖兒成班一聽到我拍戲都話要幫手，成班後生仔令到成件事變得仲好玩。趕戲係好辛苦，但出嚟嘅結果好開心。」
開心之餘，導演的工作也令Wing一試難忘，他興奮地說：「原來真係可以好好玩，件衫乜嘢顏色、點樣構圖、機器點擺全部都係你話，你諗咗想試嘅全部都可以做到，你話幾好玩，點會唔上癮！」
《全城熱戀熱辣辣》上映日期：2月18日
6個故事6段情緣
《全城熱戀熱辣辣》由6個故事組成，演員包括張學友、劉若英、徐若瑄、楊穎（Angelababy）、謝霆鋒和吳彥祖等。觀眾在嚴寒的氣溫下，感受一下熱辣辣的溫情。
大話情人
司機（張學友飾）和按摩師（劉若英飾）同時中暑，躺在醫院內，因為誤傳SMS而連上了線。在SMS的世界，兩人重拾夢想：男的自稱是法拉利車手，女的自稱是鋼琴演奏家。但當雙方終於見面互揭身份後，這個夏日的夢能否繼續下去？
企街追女
士多小伙子（井柏然飾）跟老闆打賭，要把對面工廠最美麗的少女（Angelababy飾）追到手。少女在小伙子糾纏下，跟他說只要他能在工廠外站上100天，便願意跟他拍拖。小伙子能否堅持贏得少女芳心？
飆車圓夢
冷氣修理員（謝霆鋒飾）每夜在同一時間地點，都會遇上飆電單車的女子（徐熙媛飾），每次都挑釁他駕駛的綿羊仔。原來女子每夜出來飆車，是為了幫助一班垂死病人完成心願。小子最終能否追上神秘女子，助她圓夢？
魚仔求婚
壽司店裏，魚缸內的魚仔正向魚女求婚，魚女說：「除非他們先吻啦！」說的是魚缸外木訥寡言的壽司師傅（吳彥祖飾）和女食客（徐若瑄飾），二人原來是舊情人。魚仔看得緊張，因為這正關乎牠的終身幸福。
失明詛咒
北京著名攝影師（段奕宏飾）因辭退模特兒（詩雅飾）而被詛咒，誰知翌日起來真的瞎了。攝影師跟徒弟（付辛博飾）開始尋找那位失蹤了的模特兒。
悼念亡妻
在海灘出租太陽傘的老伯（劉家輝飾），風騷地以有味笑話逗海灘上眾靚女，但他對已去世的老伴仍念念不忘，為了趕在老伴生忌前，配回神位前燒掉了的一顆停產蓮花形燈膽，老伯不惜走遍全港，誓要找到燈膽為止。
獵影巨星 張國榮滿分奉獻
夏永康雖然首次執導筒，但被他拍攝過的粒粒皆星，談到印象最深刻的就是哥哥張國榮、梅艷芳和梁朝偉。
「第一次同哥哥合作係幫佢影一輯唱片封面，個感覺係好驚，真係好驚，因為嗰個係哥哥囉。加上嗰次佢比約定嘅時間早咗到，我都未準備好，原本要放嚟影相嗰缸水諗住放半個鐘搞掂，點知要成個鐘，所有嘢都錯晒，嗰時已經驚惶失措，但哥哥仲要安慰我話：『慢慢啦唔使急』，搞到我仲驚，之後燈又打錯晒，水又反光，啲色又唔啱。嗰次嘅感覺係一團糟，但哥哥即係哥哥，任何情形佢都畀到最好你。」
梅艷芳 火速上電
「嗰次幫一本雜誌同阿梅影婚紗相，阿梅嚟到我都知死，佢個樣攰到不得了。你可能唔信，佢一埋位就變成另一個人，唔使warmup就一路畀嘢你，問題係你接到幾多，成個節奏好刺激。好多人都話阿梅係食呢行飯，佢一上到舞台就會變身。」
鍾楚紅 好玩過癮
「成日同自己講點解紅姑最紅嘅時候自己未出道，上次合作係佢退休後出番嚟影一輯珠寶相，當時佢先生（朱家鼎）都喺度。同佢合作個感覺係好好玩，可以試好多嘢，一次一定未試夠、玩夠。不過好彩過兩日又同佢影一輯時裝品牌相，到時又可以玩過。」
周潤發 擺甫一流
「發哥唔只影相叻，連擺甫士都好勁。只要佢擺好咗，你是但影一張都中到你要嘅嘢。佢等如設計埋畀你影咁滯，你要做嘅只係要按快門。」
劉嘉玲 扮蛇趴地
「嘉玲本身嘅變化可以好大，唔同時候影佢有唔同嘅韻味，而且佢乜都肯試，上次叫佢好似條蛇咁趴喺度，佢都肯做。」
梁朝偉 神機妙算
「偉仔眼神凌厲係人都知，佢最叻嘅地方係就算佢唔望你，都知你嘅機器會點、想要啲乜同點影。」
話你知：2月愛情片
