本欄於一月十五日提及香港人生活緊張，居住環境擠迫，城市空氣污染，噪音混雜，與澳洲黃金海岸之地廣人稀，空氣清新，環境舒適程度，相差極遠。但係點解香港人平均壽命之長，在世界上數一數二呢？一位讀者發來電郵，引述一啲以前報章資料話：「有研究人口的專家也曾作出結論，主要有兩點：（一）緊急服務之快速、（二）醫院之便利，相對其他國家，香港人只要一撥999，警察及救護最遲也在十多分鐘到達，對於救命來說，相當重要。另外醫院位置相對接近民居！甚至在醫院對面，故此很多時，遇上生命危險，也能及時救回一命。」
此說未嘗無理，但唔係全部理由，應該仲有好多因素嘅。香港人住得擠迫集中，有一個好處就係救護車容易到，而香港嘅公共及私人醫療系統達到世界水平，此乃不容否認之事實。西式醫療之外，香港復有廣泛之中醫藥網絡，中醫中藥嘅價錢相對便宜，絕大部分人皆可以負擔，對長期病患者（內科）有好大幫助。
教授Ｆ本在大學讀植物學，去到美國讀博士，研究分子生物學與賀爾蒙，佢話人到咗外國，就自自然然記掛中藥植物，於是寫完博士論文之後，就花多啲時間研究中藥，現在佢雖然唔係中醫，但在大學負責中藥製成品之開發。左丁山問佢，廿四味涼茶有廿四味藥，每種藥物可以透過分析，知其藥性，但廿四味放入三至四碗水，煲成一碗水，呢碗藥之藥性為何，如何分析？教授Ｆ話直至十年前，科學家仍然無法理解呢碗藥究竟是甚麼東西，但家科技儀器有突破，最新式儀器可以分析到每碗中藥對人體內蛋白質之影響，不過呢啲科學新知，佢講極都點唔明左丁山呢個科學盲，於是佢叫左丁山有空閒日子就約佢入實驗室參觀！
香港其實有好多寶，不過我哋有時身在福中不知福，唔識欣賞。上星期日在《蘋果》副刊睇到一位著名埃及詩人阿赫穆德．海加茲一篇文章，盛讚香港係烏托邦，有自由法治，繁榮安定，讚到香港天上有地下無。想嚟詩人來自埃及，熟悉中東歷年之宗教政治鬥爭、戰爭所帶來之傷害，比較之下，香港就係一個烏托邦，此或非生於安樂之八十後一代所能理解也。