尖沙嘴兩大新場同期開幕，一時間多百幾間舖等住你去行，睇到頭暈兼眼花。百花齊放之中總有令人「叮」一聲眼前一亮的新店，例如歐洲潮物SelectShop的IMAGO，首次引入多個罕見歐洲牌如DimensioneDanza、LonsdaleLondon、HollywoodMilano、Fiorucci等獨家貨，睇緊荷包，小心好似磁石一樣吸你埋去買買買！
記者：葉雪芯
攝影：伍慶泉
Model：YuLee@Puremodel
Hair&Makeup：Kinki
專入歐洲快閃貨
歐洲潮店IMAGO登陸尖嘴新場iSQUARE，主打袋款和Tee、Jacket等CasualWear，亦有部份精品文具。睇落有少少似雜架攤乜都有，但其實各位有眼不識泰山，它源自歐洲出名SelectShop「Cartorama」，今次來港首次開旗艦店改名為「IMAGO」，等於是姊妹店。全店3,000幾件貨、17個牌子，統統指定在IMAGO出現兼限量發售。一年四季可能對於各位潮童來講不夠喉，每次返新貨一等就要兩個月，歐洲原來一早興「快閃」，即係SelectShop全店每星期轉款一次玩Fast-Fashion，名副其實手快有手慢無，賣唔賣得晒都即Out不存貨。是吸水還是跟貼潮流見仁見智，但肯定少咗機會同人撞款。
首次來港開店，打響頭炮落重本，搵來曾負責LV、CK、BMW及Benz等名店的設計公司dwp做室內設計，據聞店內一盞普通的燈都要五千蚊！
17個歐洲潮牌
店內一次引進的17個歐洲潮牌，不少於歐遊時也撞口撞面，甚至於明星二手貨場或樓上水貨店見過。例如歐洲超人氣DimensioneDanza，設計加入舞蹈元素及荷李活風格，在意大利企穩長期爆紅，HipHop、StreetDance等舞蹈界無人不知，首選當然是闊身Tee和背心，Cutting較為鬆身，但質料極舒服透氣；少女甜美風格的有Fiorucci，雖然此牌非首次出現，不過店內引入款式為限定獨家款，主打閃石和色丁布料，不少短身Jacket均為歐洲熱賣斷貨，以每星期轉貨一次的速度睇怕香港店遲早步後塵。另外值得留意的英國牌LonsdaleLondon，玩英國六十年代BoxingConcept，較中性Sporty風格，英國國旗色Tone，專攻愛英倫風的朋友。
冧女小物多
香港地十個有九個半後生仔，由細到大買慣日本潮物，咁歐洲班潮童又鍾情邊一類牌子？只要行一轉IMAGO就知。店內除了袋款和CasualWear之外，同場仲有不少歐洲潮物牌子，例如由一班意大利球星帶頭搞起的鐵漢柔情SweetYear，大賣紅色心心圖案銀包；另外Fiorucci亦有推出文具套裝，今期力推與意大利愛情小品電影Crossover合作的文具系列和手袋系列，肯定冧死女；另外為人熟悉的法國牌子哈哈笑Smiley，唔講唔知原來是新聞工作者FranklinLoufrani在1971年創立的，除了文具，還有枱燈、咖啡杯、毛毛拖鞋等精品。
IMAGO（31070878）
尖沙嘴彌敦道63號iSQUARE國際廣場408號舖