中國水業（1129）係場內PB最平嘅水務股，有得諗。中國水業最新NAV0.26元，現價0.25元講緊仲有輕微折讓。場內水務股，光大國際（257）、北控水務（371）、中國水務（855）PB全部兩倍過外。連大落後嘅天津創業環保（1065），PB都講緊1倍樓上，中國水業PB最吸引。
中國水業09年半年度，因為CB公平值虧損1.3億銀，見紅1.6億銀。照計，集團09全年度亦因為非營運性虧損，業績唔慌靚仔。但要咁睇，據祖國專業水務網發報告，嚟緊5年，祖國嘅水務投資需求，已經高達2200億銀人仔。中國水業主打瓣數之一，係供水及污水設施建設，連埋祖國水資源需求日增，其他業務亦應該好肥仔。中國水業橫行半年，繼續博PB上番1.5倍到0.39元，仲係好落後。
金朝陽折讓太誇張
金朝陽（878）最新NAV18.85元，現價4.91元折讓高達74%，本港磚頭股當中，金朝陽折讓，已經夠誇張。若果連埋集團喺登龍街舊樓重建商廈項目重估，折讓分分鐘上到80%。集團呢十幾年，經歷咗幾個大周期上落，家陣業務穩紮穩打，折讓仲咁大，唔係好合理。有理冇理，呢轉冷吼金朝陽，博升20%到5.89元，集團折讓仲係高達69%。
錢雋