香港人生活節奏緊張到爆燈，連消閒娛樂都係填鴨式，好似我最鍾意砌模型，搞盒MG版悟空都要趕頭趕命、即晚起貨，其實一啲都唔悠閒。外國人就唔同，生活較為嘆慢板，唔使好有錢，獨立House大多附設埋工作室，好多人就埋頭苦幹匿喺入面，搞出創意多多嘅藝術成品。好似今日精選呢堆「手作仔」咁，全都喺八卦網度搵返嚟，特色係由廢棄金屬拼湊而成，大部份仲係來自汽車零件，成品由大猩猩到魚毛蟹仔都有，隻隻栩栩如生，車迷想考吓自己眼光嘅，不妨估吓用咩零件砌成？
記者：徐影龍
神態最似
呢隻大猩猩，明顯由一架美式古董車零件砌成，較易認到有鬼面罩做嘅身軀，胸前就係錶板，手手腳腳仲隱藏左側鏡同泵把。
歐日合作
極搞鬼嘅深海魚，用BMW廠徽做眼球效果極出，魚身仲隱約見到日產個Logo。
得意蟹仔
Volvo鐵蟹仔明顯來自軨冚，唔複雜但勁可愛。
