《FFXIII》推出之後，突然又對RPG多咗份熱情，不過若想玩一隻傳統兼且有日式味道嘅RPG遊戲，近年選擇唔多，而呢款《ArtonelicoIII》（魔塔大陸3終結世界的少女詩歌）就係相當罕見嘅一隻喇！作為PS3獨佔遊戲，又有前兩集嘅口碑，加上今集以人物互動同豐富嘅變裝功能做賣點，大把Fans等住玩。
記者：許福合
RAH系統作曲
對於想真正感受《ArtonelicoIII》好玩之處嘅機迷，唯一要求就係有一定嘅日語能力，事關遊戲中會使用大量對話進行遊戲，否則就只能狂㩒掣跳過劇情，咁就無癮喇！對上一集有玩過PS2版嘅機迷，仲記唔記得蒂莉雅塔呢？今集故事背景都有關聯，雖然劇情老掉牙，話說有個魔法組織要統治世界，將所有人變成奴隸，主角們當然要反抗到底了。先唔講打打殺殺，遊戲中有個特別功能，叫RAH系統，玩家可以作曲，再利用系統將歌曲融入戰鬥場景，唔知算唔算有主場之利呢？
性格轉變
既然係PS3獨佔，畫面當然唔會差，主角們嘅美工水準亦值得一讚，去到第三集都仍然可以Keep到，最令人滿意仲係個換裝系統，男女角都可以實現換裝，加上人格會變化，雖然未知換裝同性格有無關係，隨住性格改變，主角們嘅外形氣質都跟住改變，而打起來亦會有唔少變化，最重要係可探索主角們嘅精神世界，發掘學新詩歌招式，事關在戰鬥部份，會以詩歌取代RPG遊戲中常見嘅魔法，視覺上更會有落雷閃光，與魔法相比亦唔輸蝕。
機迷網評
又儲又要打 喪買兩隻！
《Artonelico》顯然有一班Fans默默支持，上網去巴哈哈啦區睇過，好多人話苦等咗第3集兩年多，終於有得玩，亦有忠實Fans話要一次過買兩隻，一隻用來玩，另一隻留來收藏紀念，怕刮花咁喎。亦有機迷連PS3都未有，就去預購咗《ArtonelicoIII》，果然死忠級Fans。綜合Fans們留言，佢哋嘅重點都係男女角嘅換裝系統，尤其係戰鬥時嘅玩法，最為期待。
Profile
遊戲：ArtonelicoIII
主機：PS3
類型：RPG
人數：1人
廠商：NBGI
推出日期：1月28日
