還記得一個星期前，萬人空巷逼爆中環那一夜嗎？為咗阻止669億元高鐵撥款，好多市民包圍禮賓府、包圍立法會，希望政府收回成命，可惜高官懶理，特首煲呔更擺下空城計，當中環劍拔弩張嘅時候，原來佢身在粉嶺，去咗特首別墅度周末。
1.16當晚通過撥款後，高官同多個保皇黨議員甩唔到身，差唔多同一時間，煲呔現身粉嶺，做乜佢去到咁遠呢？原來佢正在聯和墟聖約瑟堂，據當晚都喺聖約瑟堂嘅甘浩望神父講，煲呔同埋太太一齊去聖堂祈禱。
甘仔指煲呔祈禱時神情肅穆，不過神情睇嚟有啲恍惚，面容仲帶幾分憂愁。見到煲呔好似急於求神指示，甘仔話唔好意思打擾佢，所以冇主動上前打招呼，反而煲呔祈禱後同甘仔握手，可能已經向上主稟報罪過，所以只係同甘神父閒聊幾句，冇辦告解。
不了解民情難息民怨
當晚中環風頭火勢，甘仔話最衰佢冇留意新聞，唔知道咁多人要求同高官對話，否則佢一定叫煲呔去立法會外見市民，民情洶湧，有乜理由縮埋喺別墅呀！粉嶺聖若瑟堂有近60年歷史，據稱煲呔在粉嶺別墅度假時，多數會去聖約瑟堂做禮拜，又會幫襯附近食肆。
面對棘手深層次矛盾，煲呔冇符，祈禱求神指引都好正常，其實佢唔只去聖堂，有麻煩時滿天神佛乜都拜一餐，08年底佢就秘密去大嶼山寶蓮寺，搵住持釋智慧指點迷津，當時佢民望插水至歷史低位，十分閉翳，一見到智慧大師就大吐苦水，「我好慘呀！」
據講當時智慧大師勸煲呔要放下，同佢講「我話如果佢慘，我哋咪仲更加慘！」八方唔知煲呔能否參透高僧佛偈，反省吓自己有乜嘢問題，不過解鈴還須繫鈴人，煲呔唔敢面對群眾，只知求神拜佛，不問蒼生問鬼神，又點能夠了解民情、平息民怨呢？
mailto:[email protected]