繼涂謹申結婚，白鴿黨再有喜事，主席何俊仁明天嫁女，仁哥榮升外父十分高興，噚日買咗好多西餅到立法會請記者食，同大家分享做外父嘅喜悅。
由於囡囡同女婿都唔係政圈中人，所以仁哥話冇特別請政界朋友去飲，擺幾十圍主要請親戚朋友，由男家話事。出名大頭蝦嘅仁哥自言唔太清楚女兒婚禮細節，連嫁妝係乜都冇過問，因為呢啲係家庭內政，一概由太太發辦，佢唔可以「干預」。
雖然身為律師，但仁哥卻唔會為囡囡主持簽字儀式，事關佢係證婚人。仁哥又稱抱孫要順其自然，親家已退休，唔怕有利益衝突喎。雖然家有喜事，仁哥都冇休息，噚日為幾個被拒入境嘅法輪功學員奔走。