恒指公司報價開市後未幾突然故障，拖成半句鐘先恢復報價，話對炒股無影響真係搵鬼信咩！當刻股場嘩鬼叫，加上個市又係咁向下插，震駭情緒可謂霎時籠罩股海。雖然原因係機器出問題，人力控制唔到，但成件事港交所（388）點都要向股民解畫。
午後好友反攻，大市完場僅跌136點，收20726，差些少「大奇迹日」就重演一次。不過，H指收市倒升17點，收11975，已令散戶感到好振奮。大市以過千億元成交由低位回升，雖未敢講個市已見底，但相信呢一波跌浪有望喘定，短線入市博反彈，當然先以昨日低位20250作止蝕參考。
內地近期推出不少措施遏抑樓市，但城市化發展步伐未減，始終對水泥有一定需求。台泥國際（1136）剛以現金代價36億元收購昌興國際（803）水泥業務，預期在3月底完成，對台泥業務可謂如虎添翼，因收購可令其年產能5000萬噸目標可望於明年就達到，比原定2012年早一年。此外水泥價格由去年8月份開始急速反彈，每噸漲幅逾100元人民幣，至400元人民幣水平，消息利好台泥，只係個市氣氛麻麻，買貨大可以逸待勞，等股價跌穿3元先出手，中線目標6元。
方星俠