甚麼叫潮？時至今日就算你穿上一身名牌去街市買餸都未算真正的潮，除非你隨身攜帶一個潮人標記，說的不是LV或者Gucci時尚手袋，而是一部相機。
時下人人喜歡寫blog，喜圖文並茂公告天下每日的所見所聞。到街上看看，一眾少男少女港男港女，總有一部相機掛在身。攝影技術有多好因人而異，不過食飯要影餸，行街影路牌，影天空影馬路影海影花影雲，已經是這一代人的習慣。 撰文：蔡如玉、李珮洳、王連連
C君好色狂夠晒Feel
相機型號：Lomo（由數百元至過千元不等）
攝影年資：8年
C君：「我自己鍾意啲相比較粗微粒嘅效果，同埋啲顏色撞到七彩，個對比好大。呢張相係拍《死神傻了》嘅時候叫許志安擺甫士畀我影，佢着住件粉紅色衫咁sharp，我曬完張相覺得好似唱片入邊嘅宣傳相，出嚟嗰個feel真係好正。」
任賢齊急凍美景回憶
相機型號：Canon7D（約16,000元）、NikonD90（約10,000元）
攝影年資：8年
任賢齊：「我呢份工成日要飛來飛去，有時去啲好偏僻嘅地方，但風景好靚，平時市區未必睇到嘅，所以我好鍾意用相機影低嗰一刻，家都儲咗唔少相o架。呢張我喺冰島影嘅，嗰度天氣好凍，影嘅時候發現原來影白色嘢同影冰都幾難，光圈快門調校咗好耐先唔會過份曝光或者暗。我家每次睇番張相，都記得嗰日嘅情況，而且感覺到嗰度好凍，所以我特別鍾意。」
張繼聰記錄最美感覺
相機型號：Canon400D（5,000多元）
攝影年資：近3年
張繼聰：「我好鍾意阿Kay（謝安琪）呢張相嘅感覺，我成日覺得一個人好專注去做一件事，個樣係好吸引嘅。當日我靜靜咁坐埋屋企一邊，拎住部相機影佢彈結他，出到嚟嘅感覺好舒服，同佢平時出去做嘢個樣好唔同。而且我認為影相嘅對象唔望住鏡頭，影出嚟嘅感覺係自然好多。」
鄭中基豪儲30部相機
相機型號：LeicaM8軍綠特別版
攝影年資：10年
鄭中基：「呢張相係拍《老港正傳》時影嘅，最滿意係秋生肯擺甫士畀我影囉，嗰陣唔係拍緊戲，佢見我影相竟然又肯做model，張相contrast幾OK啦，其實畀我再影，我會用另一角度影得再好啲，我次次影完相都覺得可以再影好啲。家我有超過30部相機，LeicaM系列有齊，通常我會有一部菲林機同一部數碼機跟身，乜嘢都影吓，只係唔鍾意影太陽。」
麥浚龍追尋幻想空間
相機型號：PanasonicLumixGF1、RD1S、GH1（每部數千元）
影相年資：約3年
麥浚龍：「我好記得當日影呢張相時落緊雨，我喺度等緊車出去開工，之後我見到啲雨滴落地下個pattern好靚，我就淋住雨喺度影。我鍾意呢張相係因為出嚟嘅感覺好有電影感，呢一場雨可以係一套電影嘅opening，可以係恐怖片、暴力片又或者係愛情片，畀我嘅幻想空間好大。」
阿占影相最緊要有趣
相機型號：LumixGF1（7,490元）
攝影年資：逾7年
阿占：「呢張相係我校咗時間掣去影嘅，當日我同隻狗MiuMiu去咗一個草地玩，我想影一張特別嘅合照。呢張相令我鍾意嘅地方，係因為一部咁貴嘅相機都會對錯focus，好有趣，佢將個焦點對咗落我度，隻狗就矇晒，同埋難得佢咁乖，企定定唔郁。」
Donald發掘另類美態
相機型號：LumixGF1（7,000多元）
攝影年資：6年
Donald：「一睇呢張相個氣氛已經畀人好開心嘅感覺，當晚係《叱咤》慶功宴，我哋成班DJ齊齊碰杯，於是我就影晒咁多隻手舉杯，出奇地個燈光夾出嚟好靚。雖然我哋個樣唔靚，但係大家對手都好靚呀，好多同事睇番張相都讚，我覺得影開心嘅畫面比較難捕捉。」
王菀之自製童話王國
相機型號：LeicaD-Lux4（約5,000元）
攝影年資：約10年
王菀之：「其實我3歲開始就對影相有興趣，一直都想買一部單鏡機影相，但我又未去到好叻，所以唔捨得買住。呢張相就係我去北海道搭火車時影嘅，呢隻牛公仔我去到邊都帶住佢，嗰日天氣好凍，但牛仔冇帶衫，所以我用咗個紙巾袋包住佢，咁就會暖啲。佢咁樣望住個天，真係好似好想要啲溫暖咁樣，所以我特別鍾意。」
周柏豪留住童真一刻
相機型號：OlympusEP1（約7,900元）、NikonD300（約3,000元）
攝影年資：約7年
周柏豪：「相中嘅小朋友係我表弟個仔，我自己好鍾意捕捉小朋友嘅動靜，因為一定要夾準時間去影。我自小就學彈琴，但係我媽咪從來冇影過一張我彈琴嘅相，呢張相係我一直以來都好恨有o架。所以我影到呢位小朋友彈琴時嘅表情，我就好鍾意呢張相，張相出到嚟好純真。」
孫耀威攝藝人真面目
相機型號：Canon5D（連鏡頭約30,000元）
攝影年資：12年
孫耀威：「我細細個就拎住菲林相機影相，直至幾年前就轉玩數碼相機。我最鍾意影人，同埋影黑白相。我揀呢一張，係因為張相影到藝人寫實嘅一面。嗰日我影Kelvin（關楚耀）時，現場燈光唔係話好靚，但佢輪廓深，出嚟效果好好。加上平時啲人知你影佢，會刻意擺甫士，但Kelvin呢張好自然，好不經意。」
吳雨霏毋須刻意捕捉
相機型號：NikonFM2（二手價約2,000多元）
攝影年資：5年
吳雨霏：「有一日我行過見到水入邊有嚿石頭浮咗出嚟，我覺得個構圖好得意，於是即刻拎部機出嚟影，當時我都驚自己會對唔到焦，因為菲林機唔係咁易控制同影得好，點知曬出嚟一睇，張相好靚。好多時不經意影出嚟嘅相，個效果會靚過你刻意去捕捉。」
Crystal感受無限生命
相機型號：Canon400D（機身連鏡頭約8,000元）
攝影年資：2年
Crystal@HotCha：「有一日我行過旺角街頭見到一個男人，佢身體有殘缺，但係佢用粉筆寫出好靚嘅字，我影嘅只係佢寫嘅一部份。從呢張相我感受到佢嗰份毅力，令我覺得世界上冇乜嘢係冇可能，只要你肯去堅持。再細心睇佢所寫嘅字，亦都好有鼓勵作用。」
Ellen瞬間狩獵風貌
相機型號：NikonFM2（二手價約3,500元）、PentaxAuto110（忘記價錢）
攝影年資：6年
Ellen@At17：「我差唔多日日都會拎一部相機出街，見到一啲好靚嘅風景或者事物，就會即刻影低佢。相機可以影低最真實嘅一刻，呢張相喺澳洲影，用Contax120拍嘅，我覺得啱啱好捕捉到個細路女行得好快，佢仲用手掩住塊臉，影到嗰一瞬間嘅嘢，而且背景有好分明嘅顏色。」
