美女不會下廚，偏偏官仔骨骨的馬浚偉，卻入得廚房煮得幾味，最近更自薦拍攝煮食節目，借主持為名，跟大廚偷師為實。今日馬仔就以巧手家常菜出戰，與阿一徒弟林永春師傅的魚翅燕窩菜式對決。齋睇相，馬仔個甫士先勝一仗，唔知埋爐又得唔得呢？
記者：趙佩倩
攝影：林栢鈞
林永春（富東鮑魚行政總裁）
為楊貫一的入室弟子，入行三十一年獲獎無數，包括「中國烹飪大師」、「法國藍帶美食獎章」等殿堂級獎項，最拿手煮鮑參翅肚，連曾蔭權、唐英年、何鴻燊等都曾是他的座上客。他的烹調格言是：「事事認真，不停創新。」
馬浚偉（藝人）
十歲便曉入廚煮畀阿妹食，近年積極鑽研廚藝，拿手菜式包括梅子酸薑蒸魚頭、炒牛柳絲、金釀銀炒飯及韭菜蝦仁炒蛋等，一餐煮勻七餸一湯都難不倒他。
無扮嘢顯功架
恕我得罪講句，約過太多藝人做煮食訪問，十個有八個都是作狀扮識煮，幕後煮腦都是由大廚負責。不過今日馬仔全程親身上陣，切醃炒煮，每個步驟都有板有眼，一看就知入慣廚房，「屋企多數是阿爸煮飯，但我間中會約班朋友上嚟食飯，就會親自下廚，陳法拉都試過我手勢，嗰次煮了七餸一湯，有芝麻斑、燉蟲草湯、鮑片生菜、蒸排骨，都係一些家常菜。」唔係嘛！又斑又蟲草，仲話係家常菜？
望出食療書
藝人出烹飪書成風，今次馬仔打正旗號做煮食節目，會否乘勢出書教煮？「有諗過，但最想做一些有關食療的的食譜，例如寒咳的話，最好以薑茸炒飯，便有驅寒作用。」
想睇更多馬仔的真功夫，就要留意逢星期三晚七時於無綫播出的全新講煮講食節目《大廚出馬》，馬仔會四出拜訪廚藝界高人及邀請各界名人好友一同分享他的創新菜式！
大廚應戰矜貴菜
阿林炒魚翅
0hr15min
製作難度：★★★☆☆
份量：4人
跟桂花翅相似，魚翅炒得火候剛剛好，夠香、乾身但絕不嚡口。
材料
金勾翅115克（已發）、雞蛋1隻、蟹肉56克、蟹膏18克、銀芽150克、鹽/金華火腿絲各少許、上湯適量、金華火腿汁1湯匙
做法
1.大火燒熱砂煲，下油及銀芽略炒，下金勾翅及金華火腿絲炒勻。
2.逐少倒入金華火腿汁和上湯，加蟹肉和蟹膏炒勻，再下拂勻蛋漿快炒至收乾水，下鹽調味即可。
大廚教路：
炒魚翅炒得乾身，火候要控制得好，故以砂煲炒，火力平均易掌握。
阿林炒官燕
0hr15min
製作難度：★★★☆☆
份量：4人
易學難精的一道菜式，單是推蛋白，都要有相當功力才做到如此嫩滑。
材料
官燕150克（已發）、熟花蟹肉75克、蛋白6隻、上湯適量、鹽/糖/金華火腿絲各少許、炸米粉碎2湯匙、金華火腿汁1湯匙
做法
1.開大火燒熱砂煲下油，倒入蛋白，收細火推勻至凝固。
2.然後加官燕炒勻，再下熟花蟹肉拌勻，再逐少倒入金華火腿汁、上湯及炸米粉碎拌勻。
3.加鹽和糖調味後即可上碟，面撒金華火腿絲即成。
大廚教路：
燕窩不宜受鹹，所以不要太早加調味料，否則煮到水汪汪。
馬仔以家常菜出戰
韭菜蝦仁炒蛋
0hr30min
製作難度：★★☆☆☆
份量：4人
有別於一般滑蛋蝦仁，馬仔先將材料分別處理，令賣相和口感都更有層次。
材料
蝦仁10隻、雞蛋4隻（拂勻）、胡椒粉/生粉/鹽各少許、韭菜適量（切段）、蒜茸/薑茸各1茶匙、紹酒1湯匙
做法
1.蝦仁加胡椒粉、鹽及生粉拌勻醃15分鐘。
2.開大火燒熱鑊下油，爆香蒜茸及薑茸，下蝦仁炒熟後盛起。
3.再燒熱鑊下油，將韭菜炒熟，灒酒兜勻後盛起。
4.再起鑊，下蛋漿炒至凝固後，將蝦仁及韭菜回鑊炒勻後即可上碟。
馬仔教路：
炒韭菜時先下韭菜白略炒後，才下韭菜綠同炒，記得灒酒，可去除草青味。
欖菜肉鬆四季豆
0hr25min
製作難度：★★★☆☆
份量：4人
這道菜炒得有板有眼，不油膩夠乾身，很有Homemade感覺，用來佐飯一流呀！
材料
半肥瘦豬肉115克（切幼粒）、薑片3片、糖/鹽/紅椒粒各適量、蒜茸/薑茸各1茶匙、欖菜2湯匙、四季豆150克
醃料：糖/鹽各1茶匙、生抽1湯匙、紹酒/生粉各適量
做法
1.豬肉粒加醃料拌勻醃10分鐘。
2.燒熱鑊下油，爆香薑茸及蒜茸，下豬肉粒炒熟後盛起。
3.煲滾水，下薑片及糖，放入四季豆汆水後盛起。
4.燒熱鑊下油，下四季豆、鹽、糖、紅椒粒及欖菜炒勻，灒少許水，炒至收乾水，將肉碎回鑊兜勻即成。
馬仔教路：
炒豬肉粒時不用太多油，乾煸至熟會更香口。
