80後聲勢浩大，社民連出漫畫爭取80後撐公投，畫開蠱惑仔打鬥漫畫嘅洪永仁，搵到兩個拍乸埋班，趁近期政治爭拗熱潮推出以總辭、公投為背景嘅政治時事打鬥漫畫，希望以新題材為港式漫畫殺出血路。
畫《賭聖傳奇》同《拳皇》成名嘅永仁坦言今次「趁熱鬧」出新書《終極對決》，八方睇過創刊號部份內容，由雷曼爆煲開始，疑似任總嘅「金融管理局局長任向天」不齒煲呔唔救苦主，仲要屈佢食死貓，一怒之下決定角逐特首，仲搵到三個蠱惑仔幫佢「打」開特首之門。
任總唔會劈友
故事橋段好似天馬行空，不過任總係咪真係冇可能選特首呢？八方相信政圈都冇人夠膽話百分百冇可能，永仁話以任向天做主角，係因為任總受歡迎，又覺得佢係雷曼事件替死鬼，不過佢強調打鬥只佔內容三分一，任總亦唔會劈友，主要係講政治時事，透過任向天選特首講爭取民主、普選主題。
呢本以池上遼一經典《英雄本色》為靈感嘅漫畫，讀者以80後為主，永仁話有問佢哋意見，亦會搵80後寫專欄，暫定出四期，會否添食端視乎反應，最快下周三出街，因為當日泛民五俠發表辭職宣言，一於食盡個勢咁話。
