電盈（008）前日忽然大升，已令散戶感覺唔多對路，莫說係傳聞收購亞視而炒高，即使係真，對電盈都唔係一件好事，公司早前派完特別股息之後，仲有幾多現金在手，又仲有幾多債要還，再搞無線電視，揹多個包袱在身，憑乜嘢睇好？電盈喺股海吹淡風時才大升，都係藍燈籠效應居多。
湊巧「8號仔」一升，港股昨日又再大跌兼失守21000關，若話傳統智慧係迷信，但幾乎次次準又點解釋？
大陸公佈一大堆強勁經濟數據，憧憬提前加息又成為短期利淡藉口，呢輪股海氣氛認真麻麻，炒股要特別謹慎及嚴守紀律。
內地繼續推動內需刺激經濟，今年炒股主題不能沒有內需股，其中九成產品都係在內地銷售的安莉芳（1388），受惠原材料價格回落，帶動中期純利上升56%至6183萬元，值得留意。
港股近期跌勢持續，卻無阻安莉芳升勢，昨雖跌4.8%，收4.75元，屬急升後正常回吐，可吼回至4.30元買入作中線投資。
方星俠