運輸及房屋局副局長邱誠武繼日前鬼祟探訪菜園村後，噚日再現身港大校園參加公開研討會，講吓政府有冇落實公民參與，本來仲有機會同獅子女陳巧文對質，點知近來飽受偷拍困擾嘅陳巧文家有要事，臨時失場，得番立法會議員鄭家富同公共專業聯盟嘅黎廣德同邱副局辯論。冇咗80後，場面當堂失色晒。
似林公公上身
好彩，現場有唔少大學生圍觀，邱武講嚟講去三幅被，即時被學生質問佢係咪嚟錯地方，做乜講嘢牛頭唔對馬嘴？90後少女李爾雅，本身讀法律與政治，1.16都有到立法會感受氣氛，噚日就當面要邱武澄清，「咁多青年、中年，乜嘢人都有，上街衝擊立法會、禮賓府，有冇諗過政府落實公民參與夠唔夠呢？仲話我哋激進，仲話叫我哋反思，係咪我哋家做得唔好先？」
邱武話，肯定年輕人對社會嘅關心，但就唔會評論特首嘅「反思論」，事後李同學同八方講，覺得政府應該反思至啱。
住大角嘴附近嘅黃同學就問，點解嗰啲通知書全部係火星文；邱武冇正面答，淨係話會檢討諮詢機制，八方差啲以為佢林公公上身。