夠Car事：跑味學神　型過人

搵私人師傅學車，架車唔係Jazz就係Yaris，真係有啲俾佢悶親。原來今時今日，做學神都可以型過人，師傅車都可以好有跑味。新一代教車師傅鍾意玩另類，師傅車唔止頭唇包圍乜都有，仲招積到負離子清新機都裝埋，咁仲唔止，連掛住「學」字牌嘅客貨車都要玩埋暴走。咁縱壞啲學生，第日攞咗牌，要買架乜嘢車至得呀！

記者：趙慧敏
攝影：陳陶鈞
Model:Cherry@PureModels

個樣夠殺學得開心

如果記性好啲，點都記得政府幾年前新發多咗百幾個師傅牌，一時間多咗班後生仔教車師傅，佢哋對自己架搵食車簡直係愛護有加。好似阿Wing咁，三十歲考到師傅牌，順理成章將自己嘅玩車愛好延展到工作上。之前佢一直鍾意喺車身上玩花臣，喺第一代bB，佢已經玩晒拉花包圍，後嚟轉玩日本客貨車日產E24，就係貪佢變化夠多，既然家架車要日對夜對，梗唔會係一般車仔咁簡單，所以專登喺日本訂部車返嚟，就係貪佢少有，甚至可以話係第一架以水貨ist做嘅學神車。「我就係唔鍾意師傅車架架都一樣，成隊車隊咁，寧願花多少少錢玩另類，自己有滿足感，學生見到架車咁靚仔，學起車上嚟都開心啲啦。」雖然ist同Yaris都係同一副偈，要飆要劈梗係唔講得，但個樣已經夠煞食，真係唔跑得都睇得。

沙板裝LED最搶

其實喺眾多細車仔裏面，ist外形一向較為硬朗，阿Wing今次仲幫佢加晒頭唇包圍，Xenon頭燈、頭燈燈眉、霧燈，仲換埋軨，真係要乜有乜，齊晒料，令成架車更添跑味。唔止外表，裏面都零舍唔同，門邊圍上水晶，連倒後鏡都加埋個水晶皮套，學起車嚟都幾醒神。最搞鬼係車頂部負離子清新機，咁又係，日日咁多人上上落落部車，家啲流感又咁勁，整番部清新機，真係學車都放心好多。我覺得呢個師傅好細心，因為想當年自己學揸車，就要金睛火眼睇住個沙板嚟泊位，不過阿Wing竟然諗到喺沙板面加裝LED燈，一倒車盞燈就閃吓閃吓，真係泊位都得心應手啲。

海豚灰Hiace等裝身

至於阿Wing另一架客貨車，雖然係周街都係嘅豐田Hiace，不過顏色就選用較為特別嘅海豚灰，內櫳改埋同色系嘅桃木裝飾。早排仲喺日本訂咗成套Garson電鍍面網，家仲未裝得切，如果整埋，一定型仔得多。