香港就快又多一樣嘢可以威畀人睇，打晒口號要「以心建家」嘅新鴻基地產（016）噚日宣佈，旗下位於九龍站嘅環球貿易廣場（ICC）觀景台，將會喺今年第4季開幕，呢個喺ICC100樓、全球第四高嘅觀景台，有4部升降機直達，新地用1億銀打造，訪客可以從海拔393米高空，全方位360度俯瞰香港靚景。
為咗畀全世界參與呢項盛事，新地仲搞咗個「環球貿易廣場觀景台命名比賽」，為呢個觀景台起中英文名，噚日個記招亦隆而重之搵咗新地副主席郭炳聯主持，但儀式完咗就急急腳走人，冇向記者留多句說話。
其實一啲主要城市嘅摩天大廈，好多都設有觀景台，香港最多去山頂睇，喺呢方面算落後，今次終於有人肯開放個屋頂，但唔知到時要收幾錢入場費呢？