今年新股熱將由南戈壁（1878）揭幕，但出師未捷，孖展被抽飛，明顯受大市調整影響，投資者寧願用手頭現金低撈幾隻跌到殘嘅煤股仲化算，新股睇怕要等到俄鋁（486）上市先可以帶起高潮。俄鋁招股已超額認購，由於唔受散戶玩，上市首日唔挾升就奇。要怪就怪港交所（388）好心做壞事，以為可以玩死大戶，點知香港散戶求勝心切，點都會想盡法子坐上音樂椅接貨。
大有大上、細有細上嘅係福建幫思嘉集團（1863），專做防水膠、吹氣橡皮艇同氣墊等，用途非常廣泛。思嘉眾多業務中，若只論充氣材料產品，係中國最大材料製造商，既然係最大，定價理應好有優勢，奇就奇在常規材料嘅平均毛利率由08年8月底約32.2%，按年跌至15.7%，行業競爭大唔知保薦人又有乜解說。
昌盛主席教訓大
1863，剛好係08年招股突然褪軚嘅內房地產商──昌盛原本嘅上市編號。昌盛集資11億元美夢一朝粉碎，避世兩年，主席鄒錫昌終於浮上水面，講番整件事嘅來龍去脈，香港媒體唔多關注，但事件正好反映某啲大行嘅貪婪。鄒錫昌話經過呢次後，以後都唔會再搞上市，因為公司為咗上市前整靚盤數，增加土儲，喺07年11月以天價買入廣東中山廣場項目，由底價2.3億元Bid到上8.34億元人民幣，但當時公司根本冇錢，只好與一間國際投資大行商討貸款，解決燃眉之急。
屋漏兼逢連夜雨，鄒錫昌仲同某投行旗下創投基金簽下可換股債協議，向該基金發大額2500萬美元CB，利率7厘。睇落好正常，但暗藏殺機，因為雙方約定若果昌盛唔能夠喺CB年期內上市，基金可要求鄒錫昌以協議價全數回購；此外，一旦公司未能如期還本金，息率要成28厘。當時佢為求對方名氣簽下「對賭式」不平等條約，亦係咁令公司債台高築，上市不成最後要賤賣地皮同設備。
咁你知點解有啲公司上市只許成功不許失敗，華爾街大行仍可濫發花紅啦。大行之所以越做越大，皆因佢哋度出嚟嘅橋都只會係「公就佢贏、字就你輸」，呢個世界邊有Win-Win咁理想吖！
胡孟青