呢排影音舖日播夜播詹瑞文教女揀「Salad」，facebook又不斷有人轉載鬍鬚佬扮女人同男朋友拖手嘅片段，笑到睇嘅人氣都唞唔到。其實呢班人都係詹sir嘅高足，佢哋除咗做《o靚模襲地球》之外，家仲做緊《潮性辦公室》。
噚日詹瑞文同王晶宣佈會合作，喺王晶觀塘嘅寫字樓入面舉行記者會，佢哋話會將《潮性辦公室》搬上大銀幕，而詹sir嘅徒弟都會繼續演出電影版。
純港式喜劇
詹sir接受訪問嗰陣話：「我要同晶哥喺戲入面鬥過，其實都冇諗過個劇會去到咁普羅嘅層面，四個演員都好有talent（才華）同埋好勤力，希望第時大家追我哋演嘅劇追到好似電視劇咁。」
而王晶就話自己睇完話劇版都笑到碌地，佢話：「連古仔（古天樂）睇完都讚佢哋得，電影入面仲會加幾個令人性幻想嘅角色，可能係高海寧同李曼筠咁。同埋今次唔會搞合拍片，一定係港式，因為咁樣會好玩啲，香港電影遷就中港合拍片太耐喇。」