港交所（388）新任行政總裁李小加腳頭好，正式上任第4日就同主要競爭對手上海證券交易所簽訂合作協議，正如佢所講，要將挑戰轉化為機遇。
不過，佢同上海交易所總經理張育軍嘅交情就絕非4日鮮，喺佢做投資銀行時兩人已認識多年，張育軍仲話今次嚟香港目的之一，就係要祝賀李小加新官上任。
佢哋兩個噚日同台出席亞洲金融論壇，表現好有默契，可見交情非淺。好似李小加喺大會發言，雖然係國際性會議，佢仍然特登選擇用普通話講，話因為要遷就隨後發言嘅張育軍，張氏都係講普通話，可見小加好關照張氏。
而張育軍喺大會發言期間，亦超過10次暱稱對方「小加」、「小加總裁」，態度親切，同聲同氣，睇嚟滬港金融合作會有好開頭。