全城阿凡達熱潮hit到爆，連大肚婆張栢芝也為驍勇善戰的土著外星人Na'vi着迷。懷孕5個月的栢芝為跟丈夫謝霆鋒前日也暫且放低兩歲半的小Lucas半日，兩公婆拍拖去機場睇《阿凡達》（Avatar）的4D版，與腹中的Lucas細佬齊齊漫遊瑰麗的潘朵拉星宿，感受藍膚靈族上天下海的震撼場面。
新鮮出爐金球獎最佳導演占士金馬倫（JamesCameron）驚世打造的得獎立體巨獻《阿凡達》，截至前日在港上映35日，累積票房大收1.18億港元，可謂勢如破竹。這股阿凡達熱浪席捲全城，城中名人明星爭相撲飛睇戲，就連懷孕5個多月的張栢芝也情陷Na'vi族人，於前日偕同老公謝霆鋒到位於赤鱲角機場、全港唯一一間播放4D電影的超立體巨幕影館欣賞《阿凡達》。
撇低囝囝二人世界
栢芝懷孕之初，不時親自接送兩歲半囝囝Lucas上學前班，但隨着肚子越來越大，近日她大多留於家中專心養胎，湊仔重任則交傭人代勞。不過身為影后又是潮媽咪的栢芝對娛樂圈卻從未脫節，繼剛過去的周日委派Lucas出席黑人陳建州在港舉行的義賣活動後，至前日她終於破關，出巡睇全球追捧的勁片《阿凡達》4D版。
由於睇《阿》片需佩戴立體眼鏡進場，加上片中靈獸異鳥躍現；藍膚外星人飛天遁地；機械人、地球人、外星人混戰連場等，令觀眾目不暇給，毋怪乎有人因過份迷戀電影致產生藍色抑鬱，但有老公悉心呵護的栢芝則冇有怕，照樣入場睇戲。
前日下午，栢芝和霆鋒雙雙乘坐保母車直抵香港機場的2號停車場。兩人落車後，着紅色運動套裝、戴口罩及cap帽包到冚的栢芝難掩暴脹身形，腰臀變圓潤，明顯發福不少。當時她與丈夫挽手步往戲院，準備入場欣賞4時50分的《阿》片，一身牛記笠記打扮的霆鋒先到小食部買熱狗及汽水，腹大便便的栢芝反而沒吃東西，在旁靜候霆鋒開餐，其間兩人有講有笑，表現雀躍。
蹺實老公衝出戲院
及後二人由助手陪同進場，至8時許電影播完，全程未惹起觀眾注意的霆鋒與栢芝卻高度戒備，第一時間衝出戲院。沿途他們也不停四圍望，栢芝繼續蹺實老公臂彎，小鳥依人地緊隨霆鋒往停車場取車離開。
現時栢芝腹中懷有的老虎仔，預產期為今年5月，懷孕期間她甚少外出，最近一次露面是上月中現身尖沙嘴嘆茶。雖則今次是栢芝第二胎，但奶奶狄波拉依然緊張，經常送上愛心靚湯及維他命丸等給新抱仔進補。至於即將榮升大佬的Lucas，據其父親霆鋒透露，Lucas已是家中小霸王，遺傳了父母的脾性，梳李小龍髮型的他還隨父學打拳踢腿，難怪霆鋒栢芝睇《阿凡達》冇預Lucas了。
採訪：丁寧
專家話：孕婦入場小心刺激
早前有台灣觀眾入場觀看《阿凡達》時疑因受震撼畫面刺激，昏倒送院後，被發現腦幹出血，留醫11日後不治。有指《阿凡達》不適宜青光眼患者及心臟病患者觀看，以免引起不適，那懷孕5個月的張栢芝又可有問題？本報記者昨致電家庭醫生方玉輝了解，他說：「純粹睇電影一般嚟講唔會有大影響，亦都唔會影響到胎兒，反而其他刺激，譬如坐過山車、或者做劇烈運動，就擔心會受到刺激。」
話你知：風煙水霧感官享受
在香港上映的《阿凡達》有2D、3D、IMAX3D及4D版本，栢芝前日到機場欣賞的是4D版，即在3D電影基礎上再加其他感官效果。例如主角乘坐飛龍翱翔天際時，觀眾會感受到陣陣迎面而來的風；當主角跳入水中，觀眾則感受到水花四濺；打仗兵荒馬亂之際，一團團煙霧又會從四面八方而來；當劇情講述森林靈樹的種籽飄下時，又會有白色粉末出現，倍添觀眾的感官刺激。
群星出動：偉仔搶先睇潮片
《阿凡達》掀全球熱潮，明星就算冒着被發現的危險，都要入戲院親嘗電影的官能刺激。資料來源：《蘋果》資料室
藝人：梁朝偉
簡介：電影上映首日（上月17日）單拖到中環IFC看戲，只見他當日面容憔悴，佈滿鬚根。
藝人：關之琳
簡介：化淡妝穿寬鬆外套襯波鞋，到中環IFC睇《阿凡達》，離開戲院後被發現行蹤，匆匆走入四季酒店。
藝人：梁靖琪
簡介：上周三（13日）相約蕭正楠及唐詩詠到九龍灣megaBOX欣賞《阿凡達》。
