立法會財務委員會傾高鐵撥款，好似開馬拉松會議，公民黨、社民連全力拉布，其他民主派出七分力幫手，啲議員卒之傾到面露倦容，到咗星期六下午，終於要投票，結果自不然係一如所料，建制派佔多數，撥款通過，高鐵可以擇吉日開工。
建築邦一路睇直播一路發，佢認為啲反對派議員唔識政府工程投標程序，故意亂問，而啲技術官僚唔知係唔係怯場，還是太過攰，答到吞吞吐吐，舌頭好似打結咁，有一次要勞煩最熟工程嘅議員何鍾泰曲線救駕，代為澄清。
沙田陳太又係睇到，佢唔多識工程技術等枝節，但係對詹培忠極不滿意，話佢蝦女人（劉慧卿是也），又憎陳偉業粗魯無禮，只係識大聲，同劉慧卿鬧交，似足市井之徒，那有半點尊貴的議員的風範。陳太話好同情鄭汝樺局長，十足粵語片白燕家嫂，受了委屈，不敢駁嘴，不敢大聲講一句說話，攞晒形象分，香港師奶受落晒。另外一位形象不同，陽剛氣十足，企穩揸硬嘅就係財委會主席劉慧卿，做主席緊跟議事程序，不偏不倚，頂住成班男議員之惡氣，陳師奶話佢與一班沙田女選民傾電話，大家齊聲叫好，話劉慧卿為女性增光，佢又話：「你睇吓啲男人有幾冇用呀，香港冇咗劉慧卿、鄭汝樺呢類女人，香港男人點做到嘢呀。香港女性是好樣的！」
為免引起性別戰爭，左丁山不答為妙。但睇吓目前香港大氣候，以中環而言，女性行政人員及專業人士愈來愈多，進佔高位者眾，女大學生朝氣蓬勃，男大學生仲係似打機大男孩，點同女生爭呀！立法會之內，女議員嘅表現往往比男議員更勇猛，政府局長之中，女局長更有表現！
星期一《信報》有一段四分一版黑白廣告，係一群沙田師奶向劉慧卿主席（財委會主席）及鄭汝樺局長致敬嘅，睇嚟經此一役，劉慧卿在新界東（佢嘅選區）會攞到好多女士選票，下屆競選，好難有人動搖到佢。