「埋嚟睇,埋嚟揀啦喂!」我求大俠比較傳統,喺超市林立情況下堅持去街市買餸,而講到買海鮮就一定要搵相熟嘅檔口,否則隨時被斬到一頸血!近日AC米蘭球星加度素,喺米蘭以北嘅瓦雷澤省開咗間海鮮店,都幾接近佢細個想做漁夫嘅志願,若然佢嚟香港開分店,我實第一個幫襯。
至愛撚手墨魚煮豆
呢位因踢法硬朗而被稱為「鬥牛㹴」嘅球星,之前成日同人講:「如果我唔踢波,一定去做漁夫……」佢仲未掛靴,怕且暫時唔可能親力親為捕魚,開舖賣海鮮應該係實踐理想嘅第一步。日前,以佢同友人命名間舖頭「GattusoeBianchi」開張,睇佢向百多名圍觀者兜售,又親自操刀切魚,手起刀落一啲都唔生手。
加度素擺明人緣好,岩布仙尼、碧咸、朗拿甸奴等隊友齊齊畀驚喜佢,突然來訪賀佢新舖開張;連養緊傷、效力祖雲達斯嘅老友伊亞昆達亦到賀,令加度素非常感動。佢講感受時講到眉飛色舞:「我愛海鮮,想見佢哋、觸摸佢哋,當然最後係將佢哋食晒落肚。我媽媽撚手小菜墨魚煮豆係我至愛。」講到咁high,佢仲話歡迎國際米蘭球迷,甚至教練摩連奴嚟幫襯㖭!咁識講嘢,祝你生意興隆啦!
泰利賣豪宅歸園田居
加度素目標做漁夫,車路士隊長泰利亦想回歸自然。有傳佢想改變生活方式過鄉村生活,正低調為喺薩里郡嘅豪宅放盤,叫價650萬鎊(逾8,000萬港元);另外佢又賣其他物業,終極目標係儲夠錢喺鄉間買田又買地,日後同鍾意馬匹嘅太太一齊養吓動物,做個傳統英國鄉紳喎。佢寧願唔繼續同隊友杜奧巴、網球名將梅禮做鄰居,過近乎歸園田居嘅生活,講到尾,相信都係踢波壓力太大喇。