股海消息紛陳，但似乎呢輪都係利淡居多，搞到港股想反彈都有心無力。以中國經濟長遠發展來看，內地人可以投資海外遲早會實現，問題係呢類政策牽涉國內多個機構，佢哋好多時各有各講，而市場又對呢類消息十分敏感，如果一時話得，一時話唔得；又或者有報道誤傳，隨時都會引起市場大波動。
所謂疾風知勁草，逆市中揀強勢股炒，勝算應比弱勢股高，好似阜豐（546）近日跟隨大市由高位調整，昨跌至5.69元即展開反彈，倒升1.7%，收報5.94元。
阜豐中期純利大升3.1倍，賺3.54億元人民幣，第三季亦升86%，全年業績肯定交到貨，怕就怕大市氣氛唔就，故此建議想買貨者，宜候回吐時吸納，目標睇7.50元。
另一強勢股當數同類板塊的中國澱粉（3838），公司剛宣佈增大產能。早前建銀發表報告唱好，目標價睇1.80元。中澱昨一度升見1.82元，收市升2.9%，報1.79元，份報告果然有料到。
方星俠