不少雙職父母均會聘請家傭照顧小朋友，不過近年屢有家傭對小朋友照顧不周的新聞，與其又要請又要驚，倒不如學Bob一開始便堅守幾個聘請原則。他於三個月前聘請了印尼傭工Yanti，合約未完已揚言必定續約，且待她如真正家人，實行和她一起照顧19個月大的囡囡霏兒。
記者：林佩婷
攝影：楊錦文
評估只信八成
最初霏兒由婆婆照顧，但年多後發現婆婆的手腕開始痛，為減輕婆婆的工作量，即搵家傭公司幫手。跟一般人勁面試不同，Bob堅信寧缺勿濫，「因為見得多心大心細仲難揀。」他的首要條件是要有照顧小孩經驗、識講中文，對於評估報告他認為唔好盡信。「評級最多信八成，不妨將個Grade降一級，咁就估到值唔值得請。」
曾到新加坡加分
香港家傭主要來自菲律賓、泰國和印尼三地，Bob對印傭情有獨鍾，全因覺得印傭性格較純品。另外，好多人話請人講眼緣，「我覺得千祈咪以貌取人，咪見靚女就請，最緊要符合自己要求。」Bob請傭工時只見了三個，他不諱言第一眼見到Yanti，其實不合眼緣，不過面試後，已拍板請她。「首先佢中文唔錯，之前每份工都有照顧過小朋友，評估報告超好。而且佢曾喺新加坡工作，你知當地衞生要求好高。最重要係當我哋傾完偈，佢主動開門畀我哋，即時令我覺得佢好細心，感覺好舒服。」
Yanti於Bob家工作只是短短三個月，一件小小的經歷，更令Bob夫婦深信無請錯人。「囡囡同Yanti一齊瞓，我哋有同佢講如果霏兒半夜醒咗，就叫醒我哋。點知幾日都無叫過我哋，問番先知阿囡醒咗，Yanti湊佢瞓番，仲話我哋做嘢辛苦唔想嘈醒我哋，呢件事令我覺得佢好體貼，一定會同佢續約。」
待如家人咪挑剔
Bob兩夫婦都要工作，他卻不擔心女兒只黐Yanti，因為婆婆仍是湊囡囡的主力，Yanti只是協助角色。「其實咪以為乜都可以靠工人，佢唔會幫你教女、又唔會同囡囡傾心事、教做人道理，我同太太一放工或放假就接手湊女，做父母一定要犧牲私人時間。小朋友唔見一星期已經變化好大，千祈咪錯失佢哋嘅成長時間。」
雖然Yanti是家傭，Bob覺得僱主要懂得尊重她們、甚至待如家人，他們吃飯例必一齊坐，會尊重Yanti意見、見面講早晨，做完事講唔該。「人哋離鄉別井嚟打工已經好慘，而且盡心盡力為你屋企，呢份心就要識得尊敬。千萬咪以為自己係僱主就大晒，要傭工自己喺廚房食飯、故意挑剔她們的工作，同傭工關係好，自然唔怕有事發生。」
