五區公投辣㷫北京，港澳辦發表談話狂鬧，爪牙嘍囉跟住吠聲，準備辭職嘅泛民議員備受壓力，公民黨陳淑莊上環議員辦事處被爆門，卻離奇地冇財物失竊，兇徒動機成謎；社民連陳偉業仲大鑊，位於荃灣福來邨永康樓地下個議員辦事處，噚日門外竟然有一篤屎！睇嚟公投呢單嘢，阿爺真係好「糞」怒。
陳偉業話昨晨獲職員通知，福來邨議辦門外有糞便，由於並冇整污糟辦事處地方，即時通知工人清理了事，至於是否公投令阿爺「糞」怒了，佢話不願估計事件動機。陳偉業職員同八方講，朝早返工時未見糞便，至早上10點幾鐘，忽然聞到門外有異味，出外一看才赫然見到有堆新鮮熱辣糞便在地上，差啲早餐都嘔埋出嚟。
猛男自薦護淑莊
該職員又話，由於穢物太核突，冇深究係人糞或狗屎，但從體積估計，如果係狗屎，「都唔似係一般狗屎」。相比陳偉業，陳淑莊原來算好彩，議辦被爆門後，家陣用木板封死門口防盜，職員則暫到中環辦事處返工。
陳淑莊議辦爆門報晒新聞，好多保安公司即時電郵或傳真兜生意，向佢推介最新防盜系統及保安服務，令佢慳番唔少格價工夫。除咗保安公司主動兜搭，更有猛男送上門，聲稱可以提供貼身保安服務，唔係做陳淑莊保鑣，而係通宵做辦事處看更，每晚收費200蚊。
公民黨、社民連議辦連環出事，顯然事有蹺蹊，其他三個準備辭職嘅議員都幾麻煩，毓民話已有心理準備受到強力打壓，事關公投挑動中共大忌，北京一定會總動員對付兩黨，佢話左仔要搞佢哋根本避冇可避，因此亦無從防範，「總之我仆街瞓喺度起唔到身，都入佢數o架嘞！」
07年同煲呔角逐特首嘅梁家傑，收過刀、叉恐嚇信，據知佢幾個辦事處近日都冇乜異樣，樂富議辦則有閉路電視，毋須加強保安。長毛分別喺大圍、大埔同將軍澳有三個地區辦事處，近日冇收刀叉亦冇糞便臨門。
mailto:[email protected]