瑪麗醫院選定聯合醫院總監陸志聰（CC）做新總監，不過呢位新「一哥」埋位前要先去哈佛進修，署理總監陳志權捱義氣到本月尾，咁大間醫院唔可以群龍無首，醫管局冇計仔，惟有請風險管理總監梁栢賢（PY）「頂更」四個月。
醫管局總監蘇利民近日通知員工，指CC喺聯合做到3月底，跟住到美國哈佛修讀兩個月管理課程，所以5月底先到瑪麗返工。CC押後上任日期，本來可以搵陳志權做多兩個月署理總監，不過，陳志權競逐瑪麗總監落選，醫管局高層考慮到佢嘅心情，最後決定請PY落去臨時睇場。
PY同八方講，佢冇做過醫院管理，今次去瑪麗係好事，可以有機會睇吓前線實況同民情，而佢原本風險管理嘅職務就由總行政經理廖慶榮署任。