港股前日美麗的誤會，虛彈一日，噚日受到美元強勢衝擊，立即又再跌過，弱勢始終未除，恒指仲大跌391點，低收21286，由10日至100日線全部失守，MACD亦呈現「雙熊」，21000點上次低位係重要關口，好友若守唔住，會跌多1000點。
大市雖然急跌，但上升正股仍接近400隻，市場炒風仍然熾熱，亦有唔少人在尋寶，凱順能源（8203）近期個勢好強，昨日更逆流而上，高收1.26元，升8仙，升幅6.7%，成交更大增一倍到超過4000萬股，動力轉強，短線可向量度上升目標1.60元推進。
凱順係轉型股，目前正集中資源發展焦煤業務，並正進行收購俄羅斯NobelOil全部股權，Nobel係一間獨立產油及燃氣公司，在俄羅斯從事石油及天然氣勘探及生產，並擁有3塊油田。
不過，由於Nobel剛於去年底完成收購另外幾塊油田，加上天氣惡劣令盡職審查有所延遲，故原本預計在本月底可完成的交易需要延後，但有消息指公司日內會就收購進度作出詳細介紹，預計收購會以新股同現金支付。
全力進軍煤及石油業
Nobel原有股東並非泛泛之輩，中國投資公司就佔有45%權益，而香港上市的東英金融投資（1140）持有5%，餘下50%由俄羅斯石油公司擁有。凱順若完成收購Nobel，其日後發展將可大大「升呢」。
凱順目前擁有49%權益位於內蒙烏海的蒙西礦業，醞藏量約9960萬噸，去年已產出約5萬噸原煤，帶來銷售收入約700萬元人民幣，今年產量可進一步提升到40萬至50萬噸，2011及2012年目標為80萬及300萬噸。
集團早前已出售從事打印機配件及電池買賣的公司，亦無參與附屬公司LongCapital（經營汽車維修、保養和美容服務）的供股，逐步淡出非核心業務後，將會集中資源，全力向煤及石油業進軍。
郭兆誠