李超人近期除咗多次增持長和系股份，仲高調入股嘉盛控股（729），整個電動車轉型謎底終於解開。因為早前嘉盛話要以蛇吞象形式，以27.5億元收購電池大王鍾馨稼嘅電池業務，引起市場譁然，當時佢嘅股價仲未開車，仲係在毫幾子水平，收購價遠超市值。
其後股價幾乎日日升，升超過9倍後終於停牌，春江鴨變成大肥鴨，唔明國際金融中心嘅監管部門點解冇起疑心。
點都好，單刁詳細內容未出，未能評論入股729是好是壞，但睇睇事件主角鍾馨稼到底搞緊邊科，就知成件事係點。鍾馨稼自己發明咗「鋰離子電池」特快充電同高儲電量技術，據講勁過比亞迪（1211），因為佢旗下同美資及唐山市政府合營嘅海天能源，成功研製出轎車之外，仲有純電動嘅大巴、中巴，早前已喺車展同大家見面，只係傳媒當佢冇到。CCTV話，佢嘅大客車充電20分鐘可行300公里，時速就差啲，得110公里，不過電費平，每百公里只係12元（人民幣．下同）。
進軍電動車電池
鍾馨稼聲稱要發展全中國最大嘅電動車王國，現時參股同直接參與嘅項目投資額超過400億元。口氣好大，但又真係見到啲成績，除咗佢展現畀市場睇嘅轎車同旅遊巴確係識行識走，外表同內櫳都算靚仔，將比亞迪嘅心血e6比下去。此外，喺唐山嘅全中國首個電動車充電站已投入運作，仲話今年要由唐山一路到北京近郊起20個充電站，聲稱成本只需500萬元一個，比天然氣站要平得多。不過，比亞迪去年才賣到幾十部e6，市面都冇乜電動車，咁快起咁多加電站做乜？
最誇係佢要做汽車大王嘅決心，投資幾百億搞年產50萬輛純電動汽車城，2012年投產，30條生產線加埋，年營業收入達1830億元。佢仲話短期會整純電動的豪華轎車，售價100萬元，品質要同勞斯萊斯揮過喎。
成件事最醒係李超人，佢老人家有興趣只係最有潛力嘅產品──目前全球最高容量嘅鋰電池。懶理你汽車靚唔靚，全世界車廠都要用呢嚿電。
胡孟青