卿姐做財委會主席慘過夾心餅，噚日再被高官壓迫。政府修訂《電訊條例》，訂明特首及行政會議審批申請電台牌照權力同準則，卿姐同時提出修訂，加入審批時需考慮公眾意見，呢個修訂形同阿媽係女人，保皇黨都唔敢反對啦。
商務及經濟發展局局長劉吳惠蘭見卿姐修訂勢必通過，竟然反游說卿姐，話既然議員都冇意見，不如由政府提出，唔使分組點票，更易通過。咁樣「打劫」議員修訂，正一輸打贏要，卿姐梗係唔肯過佢啦，話有乜理由功就你領，鑊就議員孭，咁做法點講都唔通，所以企硬唔理官員要求。
結果議員大比數通過卿姐修訂，情況近年罕見，根據秘書處紀錄，回歸以來，連埋呢次只係有七個議員修正案獲通過，真係好矜貴。
卿姐修訂案過關，謝偉俊噚日提出要求添馬艦政府總部停工動議辯論則以42票反對被否決，反對票之多，應該破紀錄。