爆咗《FF13》啦！有人話佢畫面靚但劇情遊戲性麻麻；啱喇！呢隻緊接推出嘅RPG《LastRebellion》有劇情、玩法又喺傳統中見突破，絕對可以撫慰一班鬧爆《FF13》嘅憤青！靚女主角只得19歲，而男主角個靈魂竟然走咗入佢身體，點會唔好玩呢？
文：阿洛
乖仔遇着忤逆仔
遊戲嘅劇情好RPG；故事由魔法國家Luouvin開始，因戰亂而令怪物橫行，國王馬上徵召其養子—25歲年輕不羈嘅獵魔劍士Nine，及19歲少女魔法師Aisya回國；其間國王竟然被另一忤逆養子所殺，而結界亦同時被解除，令怪物通街走；最唔好彩嘅係當Nine回國後，卻遭暗算而身負重傷，索女Aisya為救佢惟有用禁忌之術令兩人靈魂共處一體，就係咁，主角就要一個身體兩個人分，老老實實，聽落唔係太慘。
男人做嘢女人收聲
既然遊戲玩共用軀體，所以當Nine劈緊友時，Aisya就會喺另一個空間RoomofVaminozeru待機，唔能夠幫手或做任何嘢；而Aisya用緊魔法時，當然男主角就要擰歪臉啦。咁好明顯喇，好玩之處就係不斷替換各施所長嚟連環打怪，先要靠Nine扣怪物能源，再由Aisya用魔法封印佢哋。而平常行動方面，玩家要透過四圍收風再入地圖冒險，而敵人係可見嘅，即係可以避開敵人唔使下下開拖，戰鬥系統以指令式進行，比較偏向傳統玩法。
日韓強手撐場
我知你哋o架，又嫌人哋畫面唔夠靚吖嘛，但係Game中大量插畫都由韓國插畫師ChunJun-Ho操刀，雖然好多過場都以插漫或對話做交代，CG唔多但感覺依然良好。而且《LastRebellion》仲有強手撐場，就係唱主題曲嘅熱血動畫歌王影山浩宣，以及唱片尾曲嘅創作女歌手霜月遙，兩首歌名分別係《EverLast》同《最後之路標》，睇嚟幾着重感情線，相當浪漫又感性，啱晒情人節一個人孤伶伶開PS3玩。
網上Game評
Game迷難服侍
係消費者都有權發言，好多人玩過試玩版後都鬧，話呢隻Game畫面唔掂，更有人話不如索性出喺PS2！其實又無咁過份，而且都有人反撐話遊戲性好。係咯！又要畫面靚、又要劇情好，呢度無李嘉欣o架！
Profile
遊戲：《LastRebellion》
機種：PS3
製作廠商：HitMaker
類型：RPG
人數：1人
