立法會上星期通過高鐵撥款後，高官議員走唔甩，法律超人謝偉俊噚日踢爆有人玩自困，事關當晚佢單人匹馬由正門離開立法會，遇見好多反高鐵人士，不但冇人鬧佢，反而好友善咁同佢打招呼，氣氛不知幾河蟹。
謝超人又指議員做事應該光明磊落，唔應該喺議事廳口口聲聲講反映民意，投完票卻連行出立法會面對市民嘅勇氣都冇，「所謂出得嚟行，預咗要還。」審議高鐵撥款泛民拉布，謝超人都問唔少問題，佢話期間不斷受到建制派議員同官員壓力，不斷有人傳紙仔畀佢叫佢收聲。白姐姐聲言挑戰毓民，謝超人透露白姐姐已秘密練兵，近日頻頻游水操fit啲，準備參加選戰。