港交所（388）前行政總裁周文耀上周五lastday，估唔到幾日後，港交所財務總監詹德慈亦都跟住講拜拜。港交所噚日公佈，詹生做到今年3月底就唔做，理由係有其他發展；港交所稍後時間會成立甄選委員會，物色人選填番財務總監個位。
做到3月底話有其他發展
詹德慈其實同周文耀幾有淵源，周文耀91至97年擔任聯交所行政總裁期間，詹生就喺97年之前做過聯交所上市科公司財務部副主管，同周文耀共事過；97年周文耀過檔滙豐投資管理，詹生就跟手去咗滙豐銀行負責亞太區企業財務。到周文耀03年重返港交所，詹生就喺翌年加入港交所做上市科主管特別顧問，05年10月轉做財務總監。
華華上星期喺周文耀farewell午宴遇到詹生，當時仲講緊3月就快公佈業績，估唔到轉個頭佢已打算另謀高就。不過其實都好正常嘅，跟開嘅老闆唔做，加上攤開4年攞嘅港交所認股權證又已經攞晒，要走都係時候啦。至於其他高層，據講大部份已經做咗十年以上，唔係周文耀03年回歸時先至喺度，相信走唔走都未必關周生事。
李華華
mailto:[email protected]