200km試七速波箱　夜遊最爽

十年一世代真係無講錯，80後反高鐵意難平，90後妹妹仔愛嘟嘴自拍，而我呢個70後，繼續寓工作於娛樂，載住靚女遊車河兼試車。新款Mazda3到港大半年，漫長一夜揸足200km，由旺角、8號幹線到迪士尼，試齊高速長途同鬧市塞車，呢架平民版M3，揸同坐一樣咁爽。

記者：徐影龍
攝影：周旭文
Model:Alia@PureModels

鬧市攝位一流

唔係搞爛Gag，Mazda3當然不可跟寶馬百萬身價嘅M3相比，不過以十零萬車價、1,500cc表現同乘座感，同級車中確有M3嘅王者風範。除咗我同攝影師兩名70後，該晚試車仲載住個90後妹妹仔Alia，甫見面已兜口兜面讚：「嘩，好靚仔呀……架萬事得。」跟手發狂咁攞部iPhone出嚟喪影，當然唔少得嘟起嘴仔自拍一番，仲熱情過揸機搵食嘅攝影師。
我都係第一次試新款Mazda3，早幾粒鐘已跑咗轉西貢、大埔，再兜大老山觀塘繞道返將軍澳，對架平民M3已有底。正式出發，目標係試大長途直路嘅迪欣湖，順道行吓新開嘅8號幹線。途經例必塞車爭位嘅旺角，起圍慢啲都俾小巴同的士攝晒位，好彩架M3就算齋玩D波，頭段反應仍然好快，鬧市中二三波不停上上落落，總算「唔輸陣」。

5千轉爽爆110km/h

經過長沙灣後上8號幹線，終於鬆口氣，開始迎接暢順無比嘅直路快感。第一站係汀九橋隔籬個觀景台，雖氣溫只得11度，不過見到Alia扎扎跳又再開始喪影，我都不期然四圍走，認真欣賞一下望晒兩條橋嘅超靚夜景。再度出發，青馬大橋後，就到全港限速最高嘅北大嶼山公路，由收費亭開始計時，改玩軚盤+/-，Keep住4、5千轉就升波，聽住引擎發狂高叫，剎那間去到限速嘅110km/h，超爽！
最後一站係流浮山送Model返屋企，行屯公算有番啲彎，跟住架Civic仔跑快線，玩開有條癮，少少彎都嚟個6＞5＞4拖波，再踩住油發力出彎，1.5L車仔無令我失禮。我就係鍾意Mazda3嘅+/-波箱，首配CVT無段變速，最高去到七個波，仲好玩過我12年前架棍波100仔，而且比真正棍波有更大自由度，起碼電腦會保護引擎，玩嘢用5波起步，最多慢啲，唔似棍波會死火。就算癲到7波急拍落2波，最多只係窒車同嘈，唔會掃波牙咁大鑊，令人玩得更Free。