人氣潮模楊穎（Angelababy）和賣肉組合Freeze同人唔同命，眾女雖然齊齊參演賀歲片《花田囍事2010》，但Baby孭重戲之餘，更萬千寵愛在一身，一開口讚道具靚，即獲監製兼演員的黃百鳴送贈留念。相反Freeze為劇情作性感噴血演出，最終卻被嫌意識不良，戲份全部刪走。
由楊穎、吳君如、古天樂和黃百鳴等孭飛的賀歲片《花田囍事2010》，齊放笑彈冧觀眾，片中黃百鳴更英雄救美，令Baby逃脫狼爪。
讚古裝飾物靚
劇情講述扮演落難公主的Baby，流落民間時被遺失女兒的商人黃百鳴所救，本來他發現Baby並非其親生女後，便決心拋棄她，但看到Baby在巿集遭人圍着調戲，黃百鳴忽然心軟起來出手擊退壞人。
首次參演古裝片的Baby，大讚巿集的佈景十分精美，她說：「唔使埋位嘅時候，我逐個檔攤慢慢睇，因為佈置得好靚，我仲好想買攤檔嘅道具物品。」黃百鳴見狀即答應待電影煞科後，任由Baby取走喜歡的道具和古裝飾物留念，可見Baby備受寵愛。
反觀《花》片另一場皇宮戲，講述扮演皇帝的古天樂為練功戒女色，令抱孫心切的皇太后李香琴心急不已，皇后田蕊妮遂想出妙計，安排性感宮女色誘古仔，希望激起他的性慾。
「效果太過火」
扮宮女的性感女子組合Freeze為拍該幕戲，穿上性感倒奶裝示人，沒想到最後竟被指動作意淫，有傳她們不但被古仔嫌棄，還因意識不良未能通過內地電檢，結果戲份全遭刪走，Freeze等同白做。
黃百鳴昨日證實說：「其實原意構思真係想有呢場戲，點知出嚟效果真係太過火，同賀歲電影有啲格格不入，我哋呢套戲係預3歲到80歲都啱睇，最終我睇過片發覺風格好唔啱，所以大剪一揮。雖然佢哋冇得出鏡，但我哋片酬已經畀晒。」
採訪：比華利
