內地股市慢慢向上走，相反港股一步步向下行，由20800數上21300嘅牛仔足足有千三張期指等祭旗。上次大市連跌咁多日係去年1月，結果之後都冇運行，反覆跌到3月。
投資氣氛轉差，即使A股頂得住都冇用，因為日本航空（JAL）正式申請破產保護，係金融海嘯以來首次打破「TooBigToFail」定律，亞洲基金手上肯定有唔少貨，傷亡慘重，只好急急班資回朝，睇定再作部署。加上港滙跌勢未止，繼續徘徊15個月低位，反映資金悄悄出逃。
買咗日航嘅投資者，眼見股價跌逾9成，感覺就如前年大家見到滙控（005）被質低至33元一樣，無不牙痛咁聲。喺日本，日航係基金持倉必然之選，散戶持有量更超過發行股數六成。
中線吼航空及汽車股
一直係日本人驕傲嘅日航，踏入本世紀後多次受政府打救，先有01年911事件及03年沙士，去年4月再攞2000億日圓，政府及民意終於醒覺「長貧難顧」，決心同佢劃清界線。日航債台高築總負債逾1.5萬億日圓，唔係單靠供股可以了事，申請破產入土為安係最後可以做嘅事。
投資銀行朋友話，現時有唔少客想發「死人財」，委託銀行買日航股份，博好似美國金融股咁終極大反彈，輸晒就當賭馬「惠澤社群」算數。散戶諗到，基金同航空公司點會諗唔到，先有達美航空出3億美金，拉攏日航轉會到其聯營航空聯盟中；之後美國航空同TPG基金提出，向日航注資14億美元。
日航事件反映嘅唔單止係經濟問題，更加係管治問題，以為全日空（ANA）同日航有如龜兔賽跑，最後大直路ANA報捷，仲成為大學畢業生最想加入嘅企業三甲，所以話「一剎那光輝唔代表永恒」，放喺短炒投機亦一樣，有糊要食，上周寫過咁多隻都唔食嘅朋友就罪大惡極。不過要報仇，仍可留意航空及汽車股，中線持有應有不錯回報。
胡孟青