陳法拉同諸葛梓岐（Marie）分別同Neway兩位薛家太子爺拍拖蜜運，原本河水不犯井水，但係一直傳佢哋因爭寵不和。噚日陳法拉同Marie一齊到銅鑼灣出席珊瑚飾物嘅活動，同場仲有近日傳被包嘅林莉齊齊行騷，吸引唔少龍友出現。
諸葛禮贈未來奶奶
Marie又唔覺意踢爆陳法拉遲咗半個鐘先到場。大會邀請通告竟然稱呼陳法拉同Marie係薛家準新抱，現場玩嘅遊戲都擺明以佢哋嘅戀情同緋聞搞噱頭，一向對戀情低調嘅陳法拉喺台上表現好似唔介意，但落咗台就完全唔想提。
問到陳法拉被大會稱呼為準新抱，佢話完全唔知，暫時亦冇諗過要做少奶奶，但被人擺上枱，佢就話：「我唔會介意，人在江湖身不由己。」問到農曆新年會唔會同未來奶奶拜年？陳法拉詐儍扮懵：「邊位？」再話未來奶奶，佢依然話：「邊位？」講明係薛老太，先迫於無奈先講：「唔知，冇所謂，我冇去過喎！多數都係工作中度過。」至於Marie表現就大方好多，話明初一會去男友屋企拜年，又透露會送禮畀未來奶奶，間中仲露出甜笑，可想而知佢同男友幾咁sweet。